وزیر خارجہ نے پی ڈی ایم کے گٹھ جوڑ کو غیرفطری قرار دے دیا

?️ 17 مارچ 2021

اسلام آباد(سچ خبریں) وزیرخارجہ شاہ محمود قریشی نے پی ڈی ایم پر شدید تنقید کرتے ہوئے کہا ہے کہ پی ڈی ایم  ایک غیر فطری اتحادہے اور یہ جماعتیں اپنے بچاؤ کیلئے جمع ہوئی ہیں، انہوں نے کہا کہ انتشار واضح ہوگیا، اختلاف سامنے آگیا، لگتا ہے پاکستان ڈیموکریٹک موومنٹ (پی ڈی ایم) میں مزید دراڑیں آئیں گی جبکہ پی ڈی ایم کاگٹھ جوڑ محض مفادات کی وجہ سے ہے۔

تفصیلات کے مطابق وزیر خارجہ شاہ محمود قریشی کا کہناتھا کہ پہلے ہی کہا تھا کہ پاکستان ڈیموکریٹک موومنٹ کاغیرفطری اتحاد ہے اور یہ جماعتیں اپنے بچاؤ کیلیے جمع ہوئی ہیں جبکہ استعفوں پر پیپلز پارٹی تیار نہیں ، پیپلز پارٹی نے ایسی شرط رکھی جو نواز لیگ نے مسترد کردی اور ہمیشہ کہا  ہےکہ پی ڈی ایم ایک غیرفطری اتحادہے۔

وزیرخارجہ شاہ محمود قریشی نے پی ڈی ایم کے بارے میں بات کرتے ہوئے مزید کہاکہ پی ڈی ایم کامنشور اور سوچ ایک نہیں ، پی ڈی ایم کاگٹھ جوڑ محض مفادات کی وجہ سے ہے جبکہ سینیٹ انتخابات میں ایک دوسرےپرشکوک و شبہات کا اظہارکرتے رہے۔

شاہ محمود قریشی نے استعفوں کے حوالے سے گفتگو کرتے ہوئے  کہاکہ آصف زرداری نےاستعفوں کیلیےنوازشریف کی واپسی کی شرط رکھی ، مریم نواز نے اجلاس میں آصف زرداری کی شرط کو مسترد کیا، استعفوں کے مطالبےسےمتعلق میرےبیانات ریکارڈپرموجود ہیں اور شروع سےکہتا چلاآرہاہوں پیپلزپارٹی استعفےنہیں دےگی۔

شاہ محمودقریشی کا مزید کہناتھا کہ پیپلز پارٹی کسی صورت سندھ حکومت کی قربانی نہیں دے گی، وزیر خارجہ نے مزید کہا کہ پی ڈی ایم کا اتحاد نیب کی گرفت سے بچنے کیلیے ہے اور انہوں نےاپنے بچاؤ کیلیےپی ڈی ایم میں پڑاؤ کیا ہوا تھا۔