اسلام آباد (سچ خبریں) وزیر اعظم عمران خان کی زیر صدارت وفاقی کابینہ کا اجلاس کل ہوگا جس میں ملکی سیاسی و معاشی صورتحال کا جائزہ لینے کے علاوہ مہنگائی سے متعلق اعداد و شمار ارکان کے سامنے رکھے جائیں گے۔ کابینہ اجلاس کا 13نکاتی ایجنڈاجاری کردیا گیا ہے ۔
تفصیلات کے مطابق وزیر اعظم عمران خان نے وفاقی کابینہ کا اجلاس کل طلب کر لیا ، اجلاس میں ملکی سیاسی ومعاشی صورتحال کا جائزہ لیا جائے گا اور مہنگائی سے متعلق اعداد و شمار کابینہ ارکان کے سامنے رکھے جائیں گے۔
واضح رہے کہ کابینہ اجلاس کا 13نکاتی ایجنڈا جاری کردیا گیا ہے ، اجلاس میں کابینہ کو وزارتوں اور ڈویژنزمیں خالی آسامیوں سے متعلق بریفنگ دی جائے گی اور آئی پی او پاکستان چیرمین سمیت کاپی رائٹ بورڈ کے ممبران کی تقرری کی منظوری ہوگی۔
خیال رہے کہ کابینہ ممبر الیکٹرانک سرٹی فکیشن ایکریڈیشن کونسل کی تقرری ، کابینہ 38ادویات کی زیادہ سے زیادہ قیمت مقرر کرنے اور حیسکو کے سی ای اوکوہٹانےکی منظوری دے گی۔ وزارت آبی وسائل میں ممبرپاور اور ممبر واٹر کی تعیناتی کی منظوری ، کابینہ کمیٹی برائے توانائی کے فیصلوں اور کابینہ کمیٹی برائے لیجیسلیٹو کے فیصلوں کی توثیق بھی ایجنڈے میں شامل ہیں۔
