نوازشریف کے منصوبوں کو ملک سے نکال دو تو پیچھے کچھ نہیں بچتا۔ حنیف عباسی

?️ 5 اکتوبر 2025

اسلام آباد (سچ خبریں) وزیر ریلوے حنیف عباسی نے کہا ہے کہ نوازشریف کے منصوبوں کو ملک سے نکال دو تو پیچھے کچھ نہیں بچتا۔

میڈیا سے گفتگو کرتے ہوئے حنیف عباسی کا کہنا تھا کہ شہبازشریف اور مریم نواز ملک کو مستحکم کرنے کیلئے متحرک ہیں۔ اُنہوں نے کہا کہ نوازشریف کے منصوبوں کو ملک سے نکال دو تو پیچھے کچھ نہیں بچتا، پنجاب میں الیکٹرک بسیں اور خوبصورت بس سٹاپ بن رہے ہیں،مریم نواز نے ڈیڑھ سال میں پورے صوبے میں سڑکوں کا جال بچھا دیا۔ وزیر ریلوے کا کہنا تھا کہ پاکستان نے معرکہ حق کے دوران ہندوستان کی 22چوکیوں پر قبضہ کیا،پاکستان کے شاہینوں نے بھارت کے 7جہاز مار گرائے تھے۔

حنیف عباسی کا مزید کہنا تھا کہ بھارتی 7 جنگی جہاز گرنے کی تصدیق ساری دنیا نے کی، پاکستان نے اپنی حدود میں رہ کر ہندوستان کے جہاز تباہ کیے۔ مڈل ایسٹ سینڑل ایشا میں قیادت کون کررہا ہے؟ کیسی خارجہ پالیسی ہے کہ دنیا کی خواہش ہے کہ وزیر اعظم پاکستان اُن کے ملک آئے۔ اُنہوں نے کہا کہ وزیراعظم شہبازشریف اور نائب وزیراعظم اسحاق ڈار دنیا کی قیادت کر رہے ہیں،مادرِوطن کی مخالفت میں بولنے والے کسی شخص کو نہیں مانتے، اپنے شہداء پر فخر ہے، ان کے خون پر ہزاروں حکومتیں قربان۔

وزیر ریلوے کا کہنا تھا کہ پاک فوج نے اپنے سے کئی گنا بڑے دشمن کو کو نیست و نابود کیا، ہمیں ڈیفالٹر اور بھکاری کہنے والے دشمن ملک کا غرور خاک میں ملا دیا، پاکستان کو تیزی سے ترقی اور استحکام کیجانب لے کر جا رہے ہیں۔ حنیف عباسی نے کہا کہ کل ایک اعلیٰ سطح سعودی وفد پاکستان آرہا ہے، پاکستان میں اربوں ڈالرز کی سرمایہ کاری کا امکان ہے،پنجاب میں کھیل کے میدان اور ہسپتال نہیں تھے،ہم نے عوام کو بہترین سہولیات فراہم کیں۔