موسمیاتی تبدیلی، تمام ادارے این ڈی ایم اے سے ملکر مستقبل کیلئے پلان بنائیں۔ وزیراعظم

?️ 17 جولائی 2025

اسلام آباد (سچ خبریں) وزیراعظم شہباز شریف نے کہا کہ موسمیاتی تبدیلیوں کے پیش نظر جس قسم کی پیشگوئیاں کی جارہی ہے ہمیں ابھی سےتیاری کرنا ہوگی، تمام ادارے این ڈی ایم اے کے ساتھ بیٹھ کر مستقبل کیلئے پلان بنائیں۔

تفصیلات کے مطابق وزیراعظم شہباز شریف نے نیشنل ڈیزاسٹر مینجمنٹ اتھارٹی (این ڈی ایم اے)کا ہنگامی دورہ کیا جہاں چیئرمین این ڈی ایم اے نے انہیں حالیہ بارشوں اور سیلابی صورتحال پر بریفنگ دی۔ بریفنگ میں بتایا گیا کہ رواں موسم میں معمول سے 30 سے 40 فیصد زیادہ بارش ریکارڈ کی گئی ہے اور نکاسِ آب کے لیے آپریشن جاری ہے، تاہم اس عمل میں کچھ وقت لگے گا۔

ذرائع کے مطابق این ڈی ایم اے کے دورے میں گفتگو کرتے ہوئے شہباز شریف نے کہا کہ ہمیں ابھی سے تیاری کرنا ہوگی اور مسائل کو حل کرنا ہوگا، این ڈی ایم اے کا چند ہفتے کے دوران یہ دوسرا دورہ ہے، ہر دورے میں بہترین بریفنگ دی جاتی ہے۔

وزیراعظم نے کہا کہ ماڈرن ٹیکنالوجی کا استعمال کرکے صورتحال سے آگاہ کیا جاتا ہے، این ڈی ایم اے کو جو بھی جدید آلات اور مشینری چاہیے ہوگی فراہم کرینگے، تمام اداروں کو این ڈی ایم اے کیساتھ مل کر تیاری کرنا چاہیے۔

شہبازشریف نے کہا کہ پاکستان موسمیاتی تبدیلی سے متاثر ہونے والے پہلے 10 ممالک میں شامل ہے، صوبوں نے اچھی تیاری کے ساتھ بارشوں کا مقابلہ کیا ہے، این ڈی ایم اے کی جانب سے صوبوں کیساتھ کوآرڈی نیشن بہتر ہے۔