مسلسل تیسری بار سہ ماہی ایڈجسٹمنٹ میں بجلی سستی ہونے کا امکان

?️ 3 اگست 2025

اسلام آباد: (سچ خبریں) کیپسٹی چارجزمیں کمی کےنتیجے میں کراچی سمیت ملک بھر کے بجلی صارفین کے لیے مسلسل تیسری بار سہ ماہی ایڈجسٹمنٹ میں بجلی سستی ہونےکا امکان ہے۔

ڈان نیوز کے مطابق نیپرا کی جانب سےبجلی تقسیم کارکمپنیوں کی گزشتہ مالی سال کی آخری سہ ماہی ایڈجسٹمنٹ کی مد میں بجلی صارفین کو مجموعی طور پر 53 ارب 39 کروڑ 30 لاکھ روپے کا ریلیف دینےکے لیےدرخواست پر کل سماعت کی جائےگی۔

وفاقی حکومت کی جانب سے آئی پی پیز کے ساتھ کامیاب مذاکرات کےنتیجے میں کیپسٹی چارجز میں زبردست کمی کاریلیف ایک بار پھربجلی کی قیمت میں کمی کی صورت میں عوام کو منتقل کرنے کا فیصلہ کیا گیا ہے۔

بجلی کی تقسیم کارکمپنیوں نے گزشتہ مالی سال کی آخری سہ ماہی ایڈجسٹمنٹ اپریل تاجون 2025 کی مد میں بجلی کی قیمتوں میں کمی کے لیے نیپرا میں درخواست جمع کرا رکھی ہے۔

بجلی تقسیم کار کمپنیوں نےکیپیسٹی چارجزکی مد میں 53 ارب 71 کروڑ 40 لاکھ روپے جبکہ ٹرانسمیشن اینڈڈسٹری بیوشن نقصانات میں 66 کروڑ 20 لاکھ روپے کی کمی مانگی ہے تاہم آپریشنز اینڈ میٹیننس کی مد میں صارفین سے 18 کروڑ 20 لاکھ روپے وصول کرنے کی درخواست بھی کی گئی ہے۔

حکومتی پالیسی گائیڈ لائنز کے مطابق ملک بھر میں بجلی کا یکساں ٹیرف رکھنے کے لیے سہ ماہی ایڈجسٹمنٹ کا اطلاق کے الیکڑک صارفین پربھی ہوگا۔

نیپرا درخواست پر سماعت کے بعد فیصلہ وفاقی حکومت کو بھجوائےگی اور وفاقی حکومت کی منظوری سے سہ ماہی ایڈجسٹمنٹ کی مد میں بجلی کی قیمتوں کا نوٹیفکیشن جاری کیاجائے گا۔

واضح رہےکہ گزشتہ مالی سال کی تیسری سہ ماہی جنوری تا مارچ 2025 کی ایڈجسٹمنٹ میں کراچی سمیت ملک بھر کے لیے بجلی ایک روپے 55 پیسے فی یونٹ سستی کی تھی جس کا اطلاق مئی سے لیکر جولائی دو ہزار پچیس کے لیے کیا گیا تھا۔

اس سے قبل گزشتہ مالی سال کی دوسری سہ ماہی اکتوبر تا دسمبر 2024 کی ایڈجسٹمنٹ میں بجلی ایک روپے 90پیسے فی یونٹ سستی کی گئی تھی جس کاریلیف صارفین کو اپریل سے جون 2025 کے لیے دیاگیا تھا۔