قومی پیغام امن کمیٹی کا جمعہ کو یوم پیغام پاکستان منانے کا اعلان

?️ 14 جنوری 2026

پشاور (سچ خبریں) قومی پیغام امن کمیٹی نے جمعہ کو یوم پیغام پاکستان منانے کا اعلان کر دیا۔

گورنر ہاؤس خیبرپختونخوا میں قومی پیغامِ امن کمیٹی کی جانب سے ایک اہم پریس کانفرنس کا انعقاد کیا گیا۔ جس میں دہشت گردی کے خلاف متفقہ دینی مؤقف پیش کیا گیا۔ کمیٹی نے خیبر پختونخوا کو دہشت گردی سے سب سے زیادہ متاثر ہونے والا صوبہ قرار دیتے ہوئے اسے اپنی سرگرمیوں کے لیے اولین ترجیح منتخب کیا۔ قومی پیغام امن کمیٹی کے کوآرڈینیٹر حافظ طاہر اشرفی نے کہا کہ تمام مکاتب فکر کے علمائے کرام نے متفقہ طور پر دہشت گردی کو غیر اسلامی قرار دیا ہے۔ پیغام پاکستان آئین پاکستان کے بعد سب سے مضبوط قومی اتفاق رائے کی دستاویز ہے۔ جو ملک میں امن، اتحاد اور ہم آہنگی کی ضمانت فراہم کرتی ہے۔

قومی پیغام امن کمیٹی نے واضح کیا کہ دہشت گردی کا اسلام سے کوئی تعلق نہیں۔ اور کسی بھی بے گناہ انسان کا قتل حرام ہے۔ دینی قیادت نے اسلام کو امن اور محبت کا دین قرار دیتے ہوئے فتنہ اور فساد کے خلاف جدوجہد کو جہاد اکبر قرار دیا۔ پریس کانفرنس میں ریاست پاکستان اور قومی اداروں بالخصوص افواج پاکستان کے ساتھ مکمل یکجہتی کا اظہار کیا گیا۔ مقررین نے افواج پاکستان کو اسلام اور امن کے محافظ قرار دیتے ہوئے ان کی حمایت کو دینی فریضہ کہا۔

مفتی عبد الرحیم نے کہا کہ دشمنوں کی حمایت خوارج سے بھی بدتر عمل ہے اور خوارج کے خلاف جدوجہد حق اور درست ہے۔ کمیٹی نے کہا کہ دہشت گردی کے بیشتر واقعات سرحد پار سے منسلک ہیں۔ اور افغانستان سے مطالبہ کرتے ہیں کہ وہ پاکستان میں امن کے قیام کے لیے مؤثر اقدامات کرے۔ جہاں جہاں امن کی ضرورت ہوگی، قومی پیغام امن کمیٹی وہاں دورے کرے گی اور عوام میں شعور بیدار کرے گی۔