فردوس اعوان کی اپوزیشن پر تنقید، حکومت اکیلے مافیاز سے نہیں لڑ سکتی

?️ 14 اپریل 2021

اسلام آباد (سچ خبریں) ڈاکٹر فردوس اعوان نے اپوزیشن کو ہدف تنقید بناتے ہوئے کہا کہ حکومت مافیاز سے اکیلے نہیں لڑ سکتی ، فیصلے کا اختیار عدالت کے پاس ہے، کسی کی ضمانت ہونا اس بات کی دلیل نہیں ہے کہ  وہ عدالت سے باعزت بری ہوگیا۔ضمانت میرٹ پر ہونی چاہئے۔

ان خیالات کا اظہار وزیر اعلیٰ پنجاب کی معاون خصوصی برائے اطلاعات ڈاکٹر فردوس عاشق اعوان نے اپوزیشن رہنما شہباز شریف پر تنقید کرتے ہوئے کیا، انہوں نے کہا کہ حکومت اکیلے ان مافیاز کے ساتھ نہیں لڑ سکتی، فیصلے کا اختیار عدالت کے پاس ہے، حکومت صرف گواہ پیش کرسکتی ہے۔

معاون خصوصی کا کہنا تھا کہ کسی کی ضمانت ہونا عکاس نہیں کہ عدالت سے باعزت بری ہوگیا، ضمانت کے اندر کسی جگہ نہیں لکھا کہ انہوں نے چوری نہیں کی۔فردوس عاشق اعوان نے کہا کہ ضمانت میرٹ پر نہیں ہوئی، ملزم تب ریلیف لیتا ہے جب اداروں میں غیب نہ ہو۔

خیال رہے کہ لاہور ہائی کورٹ نے آمدن سے زائداثاثہ جات کیس میں مسلم لیگ نواز کے صدر اپوزیشن لیڈر شہباز شریف کی ضمانت منظور کرتے ہوئے 50، 50 لاکھ کے 2 مچلکے جمع کرانے کا حکم دیا تھا۔دوسری جانب فردوس عاشق نے مہنگائی پر گفتگو کرتے ہوئے کہا کہ مہنگائی کے پیچھے مختلف نیٹ ورک کام کر رہے ہیں یہ نیٹ ورک نہ ہوتے تو ملک آج اجناس میں خود کفیل ہوتا۔

انہوں نے کہا کہ ہم عوام کو مسائل سے نجات دلانے کی کوشش کر رہے ہیں، عوام کو سبسڈی کی شکل میں مختلف پیکیجز دے رہے ہیں۔فردوس عاشق نے کہا کہ بدقسمتی سے حکومتی پالیسیوں پر اس کی روح کے مطابق عملدر آمد نہیں ہو رہا۔معاون خصوصی نے کہا کہ مختلف مافیاز چینی کی قلت پیدا کر رہے ہیں، رمضان بازاروں میں کام کرنے والی ٹیموں کو خود بریف کروں گی۔