اسرائیل سے تعلقات پر لیبیا کا بیان 

?️ 20 اگست 2025

اسرائیل سے تعلقات پر لیبیا کا بیان

لیبیا کی قومی اتحاد حکومت کے سربراہ عبدالحمید الدبیبہ نے اسرائیل کے ساتھ تعلقات کی عادی سازی کی خبروں کو بے بنیاد قرار دیتے ہوئے کہا ہے کہ فلسطینی عوام کے ساتھ یکجہتی اور اسرائیل سے تعلقات کی مخالفت لیبی عوام کا اٹل مؤقف ہے۔

اردنی روزنامہ الغد کے مطابق، الدبیبہ نے واضح کیا کہ بعض حلقوں کی جانب سے لیبیا پر فلسطینیوں کی جبری بے دخلی کو قبول کرنے کے الزامات سراسر جھوٹ اور میڈیا پروپیگنڈہ ہیں۔ ان کے بقول، حتیٰ کہ امریکی وزارت خارجہ نے بھی طرابلس میں اپنے سفارت خانے کے ذریعے ان دعوؤں کی تردید کی ہے۔

لیبی وزیراعظم نے ملکی حالات پر گفتگو کرتے ہوئے کہا کہ ملیشیاؤں کا خاتمہ ایک "قومی منصوبہ” ہے جس کا مقصد اداروں کو مضبوط کرنا اور ریاست کو یکجا کرنا ہے، نہ کہ کسی قسم کی ذاتی انتقام گیری۔ انہوں نے تسلیم کیا کہ ماضی کی بعض پالیسیوں نے ملیشیاؤں کو اس قدر طاقتور کر دیا تھا کہ وہ خود کو حکومت سے بالاتر سمجھنے لگے تھے۔

دوسری جانب، لیبی پارلیمنٹ نے غزہ کی صورت حال پر گہری تشویش کا اظہار کرتے ہوئے عالمی برادری سے فوری اور مؤثر اقدام کا مطالبہ کیا ہے۔ پارلیمنٹ نے اسرائیلی محاصرے اور غذائی قلت کو انسانیت کے خلاف جرم قرار دیا اور کہا کہ خواتین اور بچوں کو بھوک و پیاس سے مرنے دینا عالمی ضمیر کے لیے شرمناک ہے۔

بیان میں مزید کہا گیا کہ وقت آ گیا ہے کہ دنیا دوہرے معیار اور مجرمانہ خاموشی کو ترک کرے اور غزہ میں جاری انسانی المیے کے خلاف سخت اور واضح مؤقف اپنائے۔ لیبی پارلیمنٹ نے اقوام متحدہ اور سلامتی کونسل سے فوری مداخلت کی اپیل کی ہے۔