عمران خان کی حمایت میں بیان دینے پر اعتزاز احسن کے خلاف پارٹی میں آوازیں اٹھنے لگیں

?️ 10 مارچ 2023

لاہور: (سچ خبریں) پاکستان پیپلز پارٹی نے اعتزاز احسن کی پارٹی رکنیت معطل کرنے کا مطالبہ کر دیا۔پی پی سیکرٹری اطلاعات کے مطابق اعتزاز احسن کے حوالے سے ایک قرارداد پاس کی تھی۔قرارداد نیئر بخاری کے پاس موجود ہے۔فیصل میر کا کہنا ہے کہ اعتزاز احسن کی ریڈ لائن 40 سال سے تبدیل ہو رہی ہے،آج کل ان کی ریڈ لائن عمران خان ہیں۔

اعتزاز احسن نے عمران خان کی سپورٹ میں بیان دئیے۔پی پی سیکرٹری اطلاعات نے مزید کہا کہ اعتزاز احسن کو عمران بچاؤ تحریک شروع کر دینی چاہئیے۔یہاں واضح رہے کہ پاکستان پیپلز پارٹی کے سینئر رہنما اعتزاز احسن کی جانب سے اکثر عمران خان کی حمایت میں بیانات دئیے جاتے ہیں۔اعتزاز احسن لاہور میں عمران خان کے ہمسائے میں رہتے ہیں۔

وزیرآباد میں عمران خان پر قاتلانہ حملہ ہوا تو اعتزاز احسن وہ واحد پی پی رہنما تھے جو عمران خان کی عیادت کے لیے زمان پارک گئے۔

اعتزاز احسن کی پاکستان تحریک انصاف میں شمولیت کی خبریں پہلے بھی سرگرم رہیں۔اس حوالے سے جب عمران خان سے پوچھا گیا تو انہوں نے کہا کہ 17 سال سے خواہش ہے اعتزاز احسن تحریک انصاف کا حصہ بنیں،انتظار میں ہوں اعتزاز احسن کب پی ٹی آئی میں شامل ہو کر ساتھ چلیں گے۔ جبکہ کچھ عرصہ قبل اعتزاز احسن نے پی ٹی آئی میں شمولیت کے حوالے سے اپنا موقف دیا تھا۔

اعتزاز احسن نے پیپلز پارٹی چھوڑنے اور پی ٹی آئی میں شمولیت کی خبروں کی تردید کر دی۔ انہوں نے واضح کرتے ہوئے کہا ہے کہ پیپلز پارٹی میں ہوں اور عمران خان میرے دوست ہیں،پچاس سال عمران خان اور میرے گھر کی دیوار سانجھی ہے،پیپلز پارٹی میری فیملی ہے۔ اعتزاز احسن نے پریس کانفرنس کرتے ہوئے کہا کہ سیاسی اختلاف پر کسی کو برا بھلا کہنے یا رانا ثناء اللہ کی زبان استعمال کرنے پر یقین نہیں رکھتا۔ ایک گروہ کو خبر مل گئی کہ میں پیپلز پارٹی چھوڑ کر پی ٹی آئی میں جا رہا ہوں،یہ واویلا مچایا جا رہا ہے کہ مجھے پارٹی سے نکالنا چاہیے۔