صدر مملکت آصف علی زرداری 4 نومبر کو اہم ترین دورے پر چین روانہ ہوں گے

🗓️ 29 اکتوبر 2024

اسلام آباد: (سچ خبریں) صدر مملکت آصف علی زرداری نومبر کے پہلے ہفتے میں اہم ترین 4 روزہ دورے پر چین روانہ ہوں گے، صدرمملکت کی چینی ہم منصب سے ملاقات بھی طے ہے۔

ڈان نیوز کے مطابق صدر مملکت آصف زرداری 4 سے 7 نومبر تک چین کا دورہ کریں گے، دورے کے دوران صدر زرداری کی چینی صدر شی جن پنگ سے ملاقات طے ہے۔

ڈان نیوز کے ذرائع کے مطابق صدر زرداری کی چینی صدر شی جن پنگ سے ملاقات طے ہے، صدر زرداری 5 نومبر کو شنگھائی عالمی نمائش میں بھی شریک ہوں گے۔

ذرائع کے مطابق چینی قیادت سے ملاقاتوں میں سی پیک فیز 2، پاک چین تعلقات ،علاقائی و عالمی سلامتی سمیت دیگر باہمی امور پر پر مشاورت ہو گی۔

واضح رہے کہ رواں ماہ اسلام آباد میں منعقدہ شنگھائی تعاون تنظیم کے سربراہ اجلاس میں شرکت کے لیے چین کے وزیراعظم لی چیانگ نے پاکستان کا 4 روزہ دورہ کیا تھا۔

ڈان نیوز کے مطابق چینی وزیراعظم لی چیانگ وفد کے ہمراہ ایئرچائنا کے طیارے میں نور خان ایئر بیس پر اترے تھے، جہاں وزیراعظم شہباز شریف نے وفاقی وزرا کے ہمراہ چینی ہم منصب کا نورخان ایئر بیس پر استقبال کیا تھا۔

اس موقع پر وزیراعظم شہباز شریف کے ہمراہ، نائب وزیراعظم اسحٰق ڈار، وزیر داخلہ محسن نقوی، وزیر اطلاعات عطا تارڑ اور وزیر منصوبہ بندی وترقی احسن اقبال ودیگر اعلیٰ حکام موجود تھے۔

نور خان ایئربیس پر چینی وزیراعظم کو 21 توپوں کی سلامی پیش کی گئی جبکہ اسلام آباد میں وزیراعظم ہاؤس آمد پر لی چیانگ کو گارڈ آف آنر پیش کیا گیا، اس موقع پر آرمی چیف جنرل عاصم منیر نے بھی چینی وزیراعظم لی چیانگ کا پرتپاک استقبال کیا، چینی وزیراعظم نے گرمجوشی سے آرمی چیف سے مصافحہ کیا۔

چینی وزیراعظم نے اپنے دورے کے دوران صدر مملکت آصف زرداری، وزیر اعظم شہباز شریف اور آرمی چیف جنرل عاصم منیر سے بھی ملاقاتیں کی تھیں۔