راولپنڈی (سچ خبریں)چیف آف آرمی اسٹاف جنرل قمر جاوید باجوہ نے کہا ہے کہ شہداء کی قربانیوں کو کبھی بھول نہیں سکتے اور انہیں ہمیشہ یاد رکھیں گے ، پاکستان امن اور استحکام کے لیے اپنے شہدا کی بے لوث قربانیوں کا مقروض ہے مادر وطن کے دفاع کے لیے اپنی جان دینے سے بڑا کوئی مقدس نصب العین نہیں ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے میں کہا گیا کہ پاک فوج کے سربراہ نے جنرل ہیڈ کوارٹرز راولپنڈی میں جرات و بہادری کا مظاہرہ کرنے والے پاک فوج کے اہلکاروں کو فوجی اعزازات دینے کی ایک تقریب سے خطاب کیا۔
شہدا کو ملک کا حقیقی ہیرو قرار دیتے ہوئے آرمی چیف نے کہا کہ ’مادر وطن کے دفاع کے لیے اپنی جان دینے سے بڑا کوئی مقدس نصب العین نہیں ہے اور ہمارے شہدا کی قربانیاں رائیگاں نہیں جائیں گی۔انہوں نے کارروائیوں کے دوران داد شجاعت دکھانے اور قوم کے لیے شاندار خدمات انجام دینے والے فوجی اہلکاروں کو فوجی اعزازات سے نوازا۔
آئی ایس پی آرکے مطابق تقریب میں آرمی افسران، اعزازات وصول کرنے والے افسران و اہلکاروں کے اہلخانہ سمیت شہدا کے اہلخانہ نے شرکت کی۔اعلامیے کے مطابق 45 فوجی افسران کو ستارہ امتیاز ملٹری عطا کیا گیا جبکہ 6 افسروں، 7 جونیئر کمیشنڈ افسروں اور 12 جوانوں کو تمغہ بسالت سے نوازا گیا۔آئی ایس پی آر کے مطابق شہدا کے اہلخانہ نے تمغے وصول کیے۔