سیکریٹریٹ نے پیپلز پارٹی کو دیا بڑا دھچکا

?️ 21 مارچ 2021

اسلام آباد(سچ خبریں) سینیٹ سیکریٹریٹ نے ایوان بالا کے چیئرمین کے لیے ہونے والے حالیہ انتخابات کے بیلٹ پاکستان پیپلز پارٹی (پی پی پی) کی قانونی ٹیم کو فراہم کرنے سے انکار کردیا ہے جب کہ اس پہلے پیپلز پارٹی کی قانونی ٹیم، جس کے ممبران میں سینیٹ کے 3 سابق چیئرمین بھی ہیں، اس میں فاروق ایچ نائیک، رضا ربانی، نیئر حسین بخاری، پنجاب کے سابق گورنر سردار لطیف خان کھوسہ اور جاوید اقبال شامل ہیں۔

ٹیم نے 12 مارچ کو ہونے والے سینیٹ چیئرمین کے انتخاب کی کارروائی کی مصدقہ نقول طلب کی تھیں۔اپوزیشن کے مشترکہ امیدوار یوسف رضا گیلانی 7 ووٹ مسترد ہونے کے بعد انتخاب ہار گئے تھے، اگر ان ووٹوں کو شامل کیا جاتا تو وہ صادق سنجرانی کو ایک ووٹ سے شکست دے سکتے تھے۔

ٹیم کو 12 مارچ کو ایوان بالا میں ہونے والی تمام سرگرمیوں کی مصدقہ کاپیاں اس لیے چاہیے تھیں تاکہ کسی مناسب فورم کے سامنے ووٹوں کے رد کیے جانے کو وہ چیلنج کرسکیں۔

سیکریٹریٹ نے 18 مارچ کو سینیٹر فاروق ایچ نائیک اور ایڈوکیٹ جاوید اقبال کو خط لکھتے ہوئے کہا کہ ’12 مارچ 2021 کو ہونے والی سینیٹ کی تمام کاروائی سینیٹ کے ریکارڈ میں زبانی طور پر دستیاب ہے، جس میں ووٹوں سے متعلق پریزائڈنگ آفیسر کا فیصلہ، چیئرمین سینیٹ کے انتخاب کا اعلاناور سینیٹر سید یوسف رضا گیلانی کے پولنگ ایجنٹ سینیٹر فاروق حامد نائیک کے دلائل بھی شامل ہیں۔تاہم سیکریٹریٹ نے سینیٹر یوسف رضا گیلانی کے وکیل کو کارروائی کی تفصیلات اور ٹرانسکرپٹ فراہم کیں۔

سیکریٹریٹ نے قانونی ٹیم کو صدر مملکت ڈاکٹر عارف علوی کی جانب سے پریزائیڈنگ آفیسر کی نامزدگی کے حوالے سے وزارت پارلیمانی امور سے ہونے والے مواصلات کا ریکارڈ بھی فراہم کیا۔

تاہم پولنگ سے قبل انکشاف ہونے والے چھپے ہوئے کیمروں کی تنصیب کے بارے میں رپورٹ کے بارے میں سیکریٹریٹ نے کہا کہ ‘سیکریٹریٹ نے اس کی کوئی سرکاری ویڈیو یا تصاویر نہیں بنائیں’۔انہوں نے وکلا کو ووٹ کاسٹ کرنے کے لیے ‘سینیٹرز کو ہدایات’ کی مصدقہ کاپی بھی فراہم کیں۔

بیلٹ کی حوالگی کی درخواست کو مسترد کرتے ہوئے سیکریٹریٹ نے کہا کہ ‘انتخابی عمل کی تکمیل پر معمول کے مطابق 12 مارچ 2021 کو تمام بیلٹوں کو سیل اور محفوظ تحویل میں رکھا گیا اور اسی شام کو سینیٹر فاروق حامد نائیک نے سیکریٹری کو درخواست جمع کرائی تھی’۔

اس میں مزید کہا گیا ہے کہ ‘سینیٹ کے 2012 کے ضابطہ اخلاق اور کاروبار کے ضابطہ 258 کے شرائط کے مطابق مجاز اتھارٹی نے فیصلہ کیا ہے کہ کسی بھی عدالت کی طرف سے پوچھے جانے پر ہی بیلٹ کو ڈی سیل کیا جاسکتا ہے’۔

یہاں یہ بات واضح رہے کہ سینیٹ چیئرمین کے انتخاب کے لیے پریذائڈنگ آفیسر مظفر حسین شاہ نے یوسف رضا گیلانی کے پولنگ ایجنٹ فاروق ایچ نائیک سے کہا ہے کہ اگر وہ ووٹوں کے مسترد ہونے کے فیصلے سے مطمئن نہیں ہیں تو ٹربیونل کے سامنے شکایت درج کریں۔