سیلاب متاثرہ علاقوں میں پاک فوج کی امدادی کارروائیاں، فری میڈیکل کیمپس قائم

?️ 18 ستمبر 2025

بہاولپور (سچ خبریں) پاک فوج اور سول انتظامیہ کی سیلاب سے متاثرہ علاقوں بہاولپور، علی پور اور لودھراں میں مشترکہ امدادی کارروائیاں جاری ہیں۔

دریائے ستلج کے ملحقہ علاقوں میں ریسکیو اور ریلیف آپریشن کا سلسلہ تیز کر دیا گیا ہے۔ پاک فوج نے متاثرین کیلئے فری میڈیکل کیمپس بھی قائم کئے ہیں جہاں سیلاب زدگان کو علاج اور ضروری ادویات فراہم کی جا رہی ہیں، اس کے علاوہ، فوجی اہلکار متاثرین کو محفوظ مقامات پر منتقل کرنے اور ان کی دیگر ضروریات پوری کرنے میں بھی مصروف ہیں۔

اس موقع پر کمانڈر بہاولپور کور نے سیلاب متاثرین کی بحالی کے اقدامات کا جائزہ لیا اور جاری ریسکیو آپریشن اور طبی امداد کے انتظامات کا بھی معائنہ کیا، انہوں نے کہا کہ افواج پاکستان سیلاب متاثرین کی مکمل بحالی تک اپنے کام میں مصروف رہیں گی۔

یاد رہے کہ ریلیف آپریشن میں شامل تمام محکموں اور اداروں کی ٹیمیں متاثرین کی مدد کیلئے ہم آہنگی کے ساتھ کام کر رہی ہیں تاکہ فوری طور پر امداد فراہم کی جا سکے اور متاثرہ علاقوں کی بحالی کو یقینی بنایا جا سکے۔