سیالکوٹ واقعہ اسلامی روایات کے منافی تھا: طاہر اشرفی

🗓️ 3 جنوری 2022

اسلام آباد(سچ خبریں) وزیر اعظم کے نمائندہ خصوصی حافظ طاہر محمود اشرفی نے کہا ہے کہ سیالکوٹ واقعہ اسلامی روایات کے منافی تھا، انہوں نے  چیف جسٹس پاکستان سے درخواست کی ہے کہ سیالکوٹ سانحہ کا اسپیڈی ٹرائل کریں۔عوام میں رواداری کا شعور پیدا کرنے کے لئے آگاہی مہم شروع کرنے جا رہے ہیں۔

تفصیلات کے مطابق بین المذاہب ہم آہنگی سیمینار سے خطاب میں طاہر اشرفی  نے کہا کہ  سیالکوٹ واقعہ اسلامی روایات کے منافی تھا، اسلام مکمل امن اور آشتی کا دین ہے۔ انہوں  نے کہا کہ اسلام میں جبری شادی کی کوئی گنجائش نہیں ہے، اسلام جبری نظام کے خلاف ہے، جبری طور پر مذہب کی تبدیلی قابل قبول نہیں ہے، جبری طور پر مذہب کی تبدیلی کے خلاف ہیں جب کہ تبدیلی مذہب کے لیے پوری تحقیقات کی جاتی ہیں،  ہم عوام میں رواداری کا شعور پیدا کرنے کے لیے آگاہی مہم شروع کر رہے ہیں۔

دوسری جانب  سیمینار سے دیگر اکابرین  نے بھی خطاب کیا، اس موقع پر  مہمان خصوصی وزیر اقلیتی امور اعجاز عالم آگسٹن کا کہنا تھا کہ انسانی حقوق کے ادارے پڑوسی ملک بھارت میں انسانی حقوق کی پامالی بھی دیکھیں جہاں پچھلے 2 ماہ سے انسانی حقوق پاؤں تلے روندے جا رہے ہیں لیکن کوئی نہیں بولتا۔