دنیا نے پاکستان کی مضبوط سفارتی پالیسی اور عالمی کردار کو مان لیا۔ دی ڈپلومیٹ

?️ 9 جنوری 2026

اسلام آباد (سچ خبریں) بین الاقوامی جریدے دی ڈپلومیٹ کی رپورٹ کے مطابق عالمی سطح پر پاکستان کی مضبوط سفارتی پالیسی اور بڑھتے ہوئے عالمی کردار کو سراہا جا رہا ہے، پاکستان خطے میں مرکز نگاہ بن گیا ہے۔

بین الاقوامی کرنٹ افیئرز کے رسالہ دی ڈپلومیٹ کے مطابق مؤثر سفارتکاری کی بدولت پاکستان خطے میں مرکز توجہ بن چکا ہے، چین نے پاکستان کے بڑھتے ہوئے اثر و رسوخ اور مؤثر سفارتکاری کو خصوصی طور پر سراہا ہے، پاکستان نے بیک وقت امریکا کے ساتھ تعمیری تعلقات اور چین کے ساتھ سٹریٹجک روابط کو متوازن انداز میں برقرار رکھتے ہوئے یہ ظاہر کیا ہے کہ یہ ایک ذمہ دار ریاست ہے۔

دی ڈپلومیٹ کے مطابق چین پاکستان کو ایک اقتصادی طور پر مضبوط ملک کے طور پر دیکھتا ہے جو اپنی سرحدوں سے باہر بھی مؤثر کردار ادا کر رہا ہے، چین کے مطابق پاکستان کا عالمی اور خطے کے امور میں اہم کردار ہے اور وہ اسے ایسے عہدوں کے لیے موزوں قرار دیتا ہے جیسے کہ اقوام متحدہ کی سلامتی کونسل کی رکنیت اور شنگھائی کوآپریشن آرگنائزیشن (SCO) کی صدارت ملی۔

جریدے کی رپورٹ میں مزید کہا گیا ہے کہ پاکستان چین کے ساتھ متعدد شعبوں میں اسٹریٹجک شراکت داری کو بھی بڑی اہمیت دیتا ہے، جس سے دونوں ممالک کے تعلقات مزید مستحکم ہوئے ہیں، پاکستان کی متوازن اور مؤثر سفارتی پالیسی نے اسے عالمی سطح پر ذمہ دار اور اثر و رسوخ رکھنے والا ملک ثابت کیا ہے، جسے نہ صرف خطے میں بلکہ عالمی اداروں میں بھی اہم کردار کے لیے سراہا جا رہا ہے۔

رپورٹ کے مطابق چین نے مسئلہ کشمیر کے سلامتی کونسل کی قراردادوں کےمطابق حل پر زور دیا ہے، چین نے افغان حکومت پر اعتدال پسندی اورپڑوسیوں کے ساتھ اچھےتعلقات پر زور دیا ہے، چین خطے اور عالمی سطح پر پاکستان کی موجودہ پالیسیوں کی بھرپور حمایت کر رہاہے۔