لبنان میں استحکام کا واحد راستہ اسرائیلی حملوں کا فوری خاتمہ ہے: مصری وزیر خارجہ

لبنان میں استحکام کا واحد راستہ اسرائیلی حملوں کا فوری خاتمہ ہے، مصری وزیر خارجہ

 مصر کے وزیر خارجہ بدر عبدالعاطی نے کہا ہے کہ لبنان میں استحکام کی بحالی اسی وقت ممکن ہے جب اسرائیلی حملوں کو فوری طور پر روکا جائے اور سلامتی کونسل کی قرارداد ۱۷۰۱ پر مکمل عمل درآمد کیا جائے۔

مصری اخبار کے مطابق وزیر خارجہ نے یہ بات لبنان کے لیے فرانسیسی صدر کے خصوصی ایلچی ژاں ایو لودریان سے ملاقات کے دوران کہی۔ یہ ملاقات لبنان کی فوج اور داخلی سلامتی کے اداروں کی حمایت سے متعلق بین الاقوامی کانفرنس کے ابتدائی اجلاس کے موقع پر قاہرہ میں ہوئی۔

بدر عبدالعاطی نے لبنان کی خودمختاری اور علاقائی سالمیت کی بھرپور حمایت کا اعادہ کرتے ہوئے کہا کہ ملک میں پائیدار استحکام کے لیے قومی اداروں، خصوصاً لبنانی فوج کو مضبوط بنانا ضروری ہے تاکہ وہ اپنی ذمہ داریاں مکمل طور پر ادا کر سکے۔

انہوں نے آئندہ ماہ پیرس میں لبنان کی فوج اور سکیورٹی اداروں کی حمایت کے لیے ہونے والی کانفرنس کا خیرمقدم کیا اور لبنان کی معیشت اور تعمیر نو کے لیے ایک اور کانفرنس کے انعقاد کی کوششوں کی بھی حمایت کی۔ مصر نے ان اقدامات کی کامیابی کے لیے ہر ممکن تعاون کی پیشکش کی ہے۔

مصری وزیر خارجہ نے زور دیا کہ عالمی برادری کو جامع حکمت عملی اپنانی چاہیے اور لبنان میں استحکام اسی صورت میں ممکن ہے جب اسرائیل فوری طور پر حملے بند کرے، مقبوضہ لبنانی علاقوں سے مکمل انخلا کرے اور قرارداد ۱۷۰۱ پر بلاامتیاز عمل کرے۔

انہوں نے خبردار کیا کہ اسرائیل کی کشیدگی بڑھانے والی پالیسیوں کا تسلسل پورے خطے کے امن و سلامتی کے لیے سنگین خطرات پیدا کر سکتا ہے۔

ملاقات میں مصر، سعودی عرب، قطر، فرانس اور امریکہ پر مشتمل پانچ رکنی کمیٹی کے تحت جاری سیاسی ہم آہنگی پر بھی تبادلہ خیال کیا گیا اور لبنان میں ادارہ جاتی استحکام کی حمایت کے لیے رابطوں کو جاری رکھنے پر اتفاق کیا گیا۔