خیبرپختونخوا: سیکیورٹی فورسز کی کارروائیاں، 15 دہشتگرد ہلاک، لیفٹیننٹ سمیت 4 جوان شہید

?️ 15 فروری 2025

ڈی آئی خان: (سچ خبریں) سیکیورٹی فورسز نے خیبرپختونخوا میں 2 مختلف آپریشنز میں 15 خارجی دہشت گردوں کو ہلاک کردیا جب کہ فائرنگ کے تبادلے میں لیفٹننٹ محمد حسن اشرف سمیت 4 جوان شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبرپختونخوا میں 2 مختلف مقامات پر کارروائیاں کیں۔

ترجمان پاک فوج کے مطابق سیکیورٹی فورسز نے ڈیرہ اسمٰعیل خان میں دہشت گردوں کی خفیہ اطلاع پر آپریشن کیا جس کے نتیجے میں 9 خارجی دہشت گرد ہلاک ہوگئے۔

فورسز کی جانب سے دوسرا آپریشن شمالی وزیرستان میں کیا گیا، جہاں 6 خارجی دہشت گردوں کو ہلاک کیا گیا۔

آئی ایس پی آر نے بتایا کہ دہشت گردوں سے جھڑپ کے دوران شدید فائرنگ کا تبادلہ ہوا جس کے نتیجے میں 4 فوجی جوان بھی شہید ہوگئے، جن میں ایک لیفٹننٹ بھی شامل تھا۔

شہید ہونے والوں میں لیفٹیننٹ محمد حسن اشرف، نائب صوبیدار محمد بلال، سپاہی فرحت اللہ اور سپاہی ہمت خان شامل ہیں۔

ترجمان پاک فوج کا مزید کہنا تھا کہ ہلاک خوارج دہشت گردی کی کارروائیوں میں ملوث تھے جب کہ فورسز دہشت گردی کے خاتمے کے لیے پرعزم ہیں۔

خیال رہے کہ دو روز قبل سیکیورٹی فورسز نے خیبرپختونخوا کے علاقوں میں 5 مختلف کارروائیوں کے دوران 13 خارجی دہشت گردوں کو ہلاک کیا تھا۔

سیکیورٹی فورسز کی جانب سے ڈیرہ اسمٰعیل خان، وزیرستان، لکی مروت اور خیبر کے علاقوں میں آپریشن کیے گئے، دہشت گردوں کی موجودگی کی خفیہ اطلاع پر کارروائیاں کی گئی تھیں۔