اسلام آباد:(سچ خبریں) وزیراعظم شہباز شریف سمیت وفاقی کابینہ کے دیگر اراکین کے دورۂ جنیوا پر پاکستان تحریک انصاف (پی ٹی آئی) کے رہنماؤں نے تنقید کرتے ہوئے کہا ہے کہ کانفرنس میں ایک بھی اہم عالمی رہنما نے شرکت نہیں کی، اگر ساری کانفرنس ویڈیو لنک پر کرنی تھی تو جنیوا جانے کی کیا ضرورت تھی؟
پی ٹی آئی کے سینئر نائب صدر فواد چوہدری کا کہنا تھا ڈونر کانفرنس میں میزبان فرانس نے ایک کروڑ ڈالر دئیے، کانفرنس میں ایک بھی اہم لیڈر نے شرکت نہیں کی۔
انہوں نے سوال کیا کہ اگر ساری کانفرنس ویڈیو لنک پر کرنی تھی تو جنیوا جانے کی کیا ضرورت؟
فواد چوہدری نے افسوس کا اظہار کرتے ہوئے کہا کہ پیسے تو نہیں آئے لیکن کئی لاکھ ڈالر وزیراعظم اور ان کی کابینہ کے دورے ہر لگ گئے۔
پی ٹی آئی کی سینئر رہنما شیریں مزاری نے بھی حکومت پر تنقید کرتے ہوئے ٹوئٹ میں کہا کہ جنیوا میں ڈونر کانفرنس میں انتہائی کم لوگوں نے شرکت کی اور یہ کانفرنس جنیوا میں اقوام متحدہ کی سائڈ میٹنگ میں سے ایک تھی کیونکہ یہاں کانفرنس کے مرکزی اجلاس کے بجائے صرف سائیڈ میٹنگ ہوتی ہیں’۔
انہوں نے مزید کہا کہ چھوٹے سے اجلاس میں ایسا لگ رہا ہے کہ صرف پاکستانی حکام موجود ہیں۔ مسلم لیگ (ن) پر کڑی تنقید کرتے ہوئے فوادچوہدری نے الزام لگایا کہ مسلم لیگ (ن) کی قیادت کے لیے جھوٹ بولنا ان کی زندگی کا حصہ ہے۔
انہوں نے کہا کہ ’پنجاب اسمبلی میں 17 بل منظور ہوئے اور مسلم لیگ (ن) گنتی سے بھاگتی رہی، خواجہ آصف،سعد رفیق اور دیگر کے مطابق اگر نمبر زیادہ ہیں تو قانون سازی روک کے دکھاتے‘۔
