بیرنز نے پاکستان کی معاشی بحالی کو منی معجزہ قرار دیا ہے۔ احسن اقبال

?️ 15 مئی 2025

اسلام آباد (سچ خبریں) وفاقی وزیرِ منصوبہ بندی احسن اقبال کا کہنا ہے کہ بیرنز نے پاکستان کی معاشی بحالی کو منی معجزہ قرار دیا ہے۔

تفصیلات کے مطابق وفاقی وزیرِ منصوبہ بندی احسن اقبال نے میڈیا سے گفتگو کرتے ہوئے کہا ہے کہ مختصر مدت میں پاکستان کی بڑی کامیابی پر معاشی تجزیہ کار حیران ہیں۔ اڑان پاکستان پر عمل درآمد جاری ہے، ٹیم پاکستان بن کر ایسی ہی کامیابیاں حاصل کریں گے جیسی دفاعی میدان میں حاصل کیں۔

احسن اقبال نے کہا ہے کہ جنگ میں تعداد اور وسائل نہیں جذبہ اور صلاحیت ضروری ہے، ترسیلات میں ریکارڈ اضافہ جاری ہے، اس سال ترسیلاتِ زر کو 38 ارب تک پہنچائیں گے۔

وفاقی وزیرِ منصوبہ بندی نے کہا ہے کہ افراطِ زر 40 فیصد سے 2 فیصد پر آ گیا ہے، پالیسی ریٹ 23 فیصد سے 11 فیصد پر آگیا۔

انہوں نے یہ بھی کہا ہے کہ آئندہ بجٹ میں ٹیکنالوجی کی مدد سے برآمدات بڑھانے کے اقدامات کریں گے، پاکستانی معیشت بھرپور طریقے سے آگے بڑھ رہی ہے۔