روس کا ٹرمپ کی مجوزہ امن کونسل کے ابتدائی اجلاس میں شرکت سے انکار

?️ 12 فروری 2026

روس کا ٹرمپ کی مجوزہ امن کونسل کے ابتدائی اجلاس میں شرکت سے انکار

روسی وزارت خارجہ کی ترجمان ماریا زاخارووا نے اعلان کیا ہے کہ ماسکوامن کونسل کے پہلے اجلاس میں شرکت نہیں کرے گا، جبکہ اس حوالے سے روس کا باضابطہ مؤقف تیار کیا جا رہا ہے۔

روسی خبر رساں ایجنسی تاس کے مطابق زاخارووا نے جمعرات کو ایک پریس بریفنگ کے دوران کہا کہ روس اس کونسل کے بارے میں اپنی پوزیشن مرتب کر رہا ہے، تاہم ابتدائی اجلاس میں روسی نمائندے شریک نہیں ہوں گے۔

رپورٹس کے مطابق امن کونسل کا پہلا اجلاس 19 فروری کو واشنگٹن میں منعقد ہونے والا ہے۔

اس سے قبل کریملن کے ترجمان دیمتری پیسکوف نے کہا تھا کہ امریکہ میں منجمد روسی اثاثوں میں سے ایک ارب ڈالر غزہ کے لیے مجوزہ “امن بورڈ” کو منتقل کرنے کے لیے ضروری ہے کہ واشنگٹن ان رقوم کو پہلے آزاد کرے۔ ان کے مطابق اس عمل کا قانونی طریقہ کار ابھی واضح نہیں ہے۔

پیسکوف نے زور دیا کہ یہ اثاثے اسی صورت منتقل ہو سکتے ہیں جب امریکی حکومت اس حوالے سے ٹھوس اور عملی اقدامات اٹھائے۔

واضح رہے کہ روسی صدر ولادیمیر پوتن نے حال ہی میں تجویز پیش کی تھی کہ امریکہ میں منجمد روسی اثاثوں میں سے ایک ارب ڈالر غزہ سے متعلق امن اقدامات کے لیے مختص کیے جائیں۔