زلنسکی نے انتخابات کرانے کی خبروں کو مسترد کر دیا

زلنسکی نے انتخابات کرانے کی خبروں کو مسترد کر دیا

یوکرین کے صدر وولودیمیر زیلنسکی نے ان خبروں کی تردید کی ہے جن میں کہا جا رہا تھا کہ وہ 24 فروری کو جنگ کے آغاز کی سالگرہ کے موقع پر انتخابات کرانے کا اعلان کرنے والے ہیں۔

برطانوی اخبار انڈیپنڈنٹ کے مطابق زیلنسکی نے سوشل میڈیا پر جاری بیان میں کہا کہ اگر قبل از وقت انتخابات سے متعلق کوئی ارادہ یا قدم موجود بھی ہو تو جنگ کی سالگرہ جیسے دن کو سیاسی اعلان کے لیے استعمال کرنا “انتہائی احمقانہ خیال” ہوگا۔

تاہم صحافیوں سے گفتگو کرتے ہوئے انہوں نے کہا کہ یوکرین انتخابات کے لیے تیار ہے، لیکن اس کے لیے سیکیورٹی کی صورتحال بنیادی شرط ہے۔ ان کا کہنا تھا: “یہ بہت سادہ ہے جنگ بندی ہو جائے تو انتخابات ہو جائیں گے۔ یہ مکمل طور پر سلامتی کا معاملہ ہے۔

زیلنسکی 2019 میں بھاری اکثریت سے صدر منتخب ہوئے تھے۔ یوکرینی آئین کے تحت ملک میں مارشل لا نافذ ہونے کی صورت میں عام انتخابات نہیں کرائے جا سکتے، اور روس کے ساتھ جاری جنگ کے باعث ملک بدستور ہنگامی حالت میں ہے۔

حالیہ دنوں میں بعض رپورٹس میں دعویٰ کیا گیا تھا کہ زیلنسکی رواں ماہ انتخابات کا اعلان کر سکتے ہیں، جسے بعض مبصرین نے امریکی دباؤ اور کریملن و وائٹ ہاؤس کی جانب سے ان کی جمہوری حیثیت پر اٹھائے گئے سوالات کے تناظر میں دیکھا۔

یاد رہے کہ روسی صدر ولادیمیر پوتن نے 21 فروری 2022 کو ڈونیتسک اور لوہانسک کی خود ساختہ عوامی جمہوریاؤں کو تسلیم کیا تھا، جس کے تین روز بعد 24 فروری کو روس نے یوکرین کے خلاف فوجی کارروائی شروع کی، جسے ماسکو نے “خصوصی فوجی آپریشن” قرار دیا۔

روس کی اس کارروائی کے جواب میں امریکہ اور مغربی ممالک نے ماسکو پر وسیع پابندیاں عائد کیں اور کییف کو اربوں ڈالر مالیت کی فوجی و دفاعی امداد فراہم کی۔