بلوچستان: دہشت گردوں کے حملے سے ایک جوان شہید ، 3 دہشت گرد ہلاک

?️ 14 اگست 2021

راولپنڈی(سچ خبریں) بلوچستان کے ضلع لورالائی میں دہشت گروں نے ایف سی کی گاڑی پر حملے کیا جس  کے نتیجے میں ایف سی نے جوابی کاروائی کی تاہم فائرنگ کے تبادلے میں نائیک شریف شہید ہوئے جبکہ میجر قاسم اور ایف سی کاایک جوان زخمی بھی ہوا۔تین دہشت گرد بھی مارے گئے۔

پاک فو ج کے شعبہ تعلقات عامہ (آئی ایس پی آ ر) کی جانب سے بیان میں کہا گیا ہے کہ بلوچستان کے ضلع لورالائی کے قریب دہشت گردوں نے ایف سی کی گاڑی پر حملہ کردیا ،جس پر ایف سی نے بھرپور کارروائی کرتے ہوئے تین دہشت گردوں کو ہلاک کردیا۔

آئی ایس پی آر کے مطابق دہشتگردوں سے فائرنگ کے تبادلے میں نائیک شریف شہید ہوئے جبکہ میجر قاسم اور ایف سی کاایک جوان زخمی بھی ہوا، جنہیں فوری طورپر سی ایم ایچ کوئٹہ منتقل کردیا گیا ہے۔

گذشتہ روز سیکیورٹی فورسز نے جنوبی وزیرستان میں دہشت گردوں کے خلاف کارروائی کرتے ہوئے ایک دہشت گرد کو ہلاک اور ایک کو زخمی حالت میں گرفتار کرلیا تھا۔آئی ایس پی آر کا کہنا تھا کہ کارروائی کے دوران دہشت گردوں کی فائرنگ سے نائیک ضیا الدین شہید ہوگئے، جن کا تعلق مردان سے ہے، گرفتار دہشت گرد نے فوجی چوکی پر حملے کی منصوبہ بندی کا انکشاف کیا۔