اسلام آباد (سچ خبریں) مقامی ذرائع ابلاغ کی رپورٹ کے مطابق چیف سیکریٹری سندھ ممتاز علی شاہ کے جاری کردہ نوٹیفکیشن کے مطابق 21 گریڈ کے افسر غلام نبی میمن کے تبادلے کا اطلاق فوری ہوگا ایڈیشنل انسپیکٹر جنرل کراچی غلام نبی میمن کا تبادلہ کرکے اسپیشل برانچ سندھ میں ایڈیشنل آئی جی تعینات کردیا گیا۔
اس کے علاوہ ایک علیحدہ نوٹیفکیشن میں اسپیشل برانچ سندھ کے افسر عمران یعقوب منہاس کو ایڈیشنل آئی جی کراچی تعینات کردیا گیا جس کا اطلاق بھی فوری ہوگا۔
واضح رہے کہ رواں سال مئی کے مہینے میں وفاق نے حکومت سندھ کو آگاہ کیا تھا کہ اسے وفاقی حکومت کے ایک کام کے لیے کراچی پولیس کے سربراہ ایڈیشنل انسپکٹر جنرل غلام نبی میمن کی خدمات درکار ہیں۔
اسٹیبلشمنٹ ڈویژن کی جانب سے چیف سیکریٹری سندھ کو ارسال کردہ مراسلے میں لکھا گیا تھا کہ ‘وفاقی حکومت کے ایک کام کے لیے اسٹیبلشمنٹ ڈویژن کو غلام نبی میمن (پی ایس پی/گریڈ 21) کی خدمات درکار ہیں’۔
خط میں مؤقف اختیار کیا گیا تھا کہ مذکورہ درکار خدمات اس افسر کے لیے بھی ‘فائدہ مند’ ہوں گی کیوں کہ گریڈ 22 میں ترقی کے لیے متنوع تجربے کے ساتھ ساتھ مختلف جگہوں پر سروسز ‘اہم نکات’ سمجھی جاتی ہے کہا گیا کہ اس لیے حکومت سندھ کے پاس مذکورہ افسر کی اضافی سروسز سے ان کی ترقی کے پہلو متاثر ہوسکتے ہیں۔
خط میں نشاندہی کی گئی کہ حال ہی میں اسٹیبلشمنٹ ڈویژن نے پولیس سروس آف پاکستان (پی ایس پی) کے افسران کو ترقی دی ہے اور حکومت سندھ میں متعدد اسامیوں پر ایک گریڈ 21 کا افسر ہے۔
خیال رہے کہ سندھ حکومت کو غلام نبی میمن کی خدمات 22 اپریل 2019 کو حاصل ہوئی تھیں اس وقت وہ انٹیلی جنس بیورو میں کام کررہے تھے اس کے علاوہ انہوں نے برطانیہ میں پاکستان ہائی کمیشن میں 3 سال تک فرائض بھی انجام دیے تھے۔
