افغان فورسز کی چمن میں سول آبادی پر بلااشتعال فائرنگ، پاکستان کا مؤثر جواب

?️ 15 اکتوبر 2025

کوئٹہ (سچ خبریں) افغان فورسز کی جانب سے چمن میں سول آبادی پر بلااشتعال فائرنگ کی گئی جس کا پاکستان کی جانب سے مؤثر جواب دیا گیا۔

سکیورٹی ذرائع کے مطابق چمن میں پاک افغان سرحد پر صورتحال ایک بار پھر کشیدہ ہوگئی، افغان فورسز نے بلا اشتعال فائرنگ کرکے سول آبادی کو نشانہ بنایا جس کے نتیجے میں 2 بچوں سمیت 4 افراد زخمی ہوئے جنہیں فوری طور پر قریبی ہسپتال منتقل کیا گیا ہے۔

حکام کے مطابق سکیورٹی فورسز نے جوابی کارروائی کرتے ہوئے ویش منڈی اور سپن بولدک میں افغان طالبان کے ٹھکانوں کو نشانہ بنایا جس میں 2 افراد ہلاک اور 10 زخمی ہوئے، فائرنگ کا سلسلہ فی الحال رک گیا ہے اور علاقے میں سکیورٹی سخت کر دی گئی ہے۔

کشیدگی کے پیش نظر چمن کے تمام تعلیمی اداروں میں آج چھٹی دے دی گئی ہے جبکہ وہاں جاری پولیو مہم کو بھی عارضی طور پر منسوخ کر دیا گیا ہے۔

سکیورٹی فورسز ذرائع کا کہنا ہے کہ حالات مکمل کنٹرول میں ہیں اور کسی بھی ممکنہ صورتحال سے نمٹنے کے لیے سرحدی علاقوں میں گشت بڑھا دیا گیا ہے۔