افغانستان کا امن پاکستان کا امن ہے: محمود اشرفی

?️ 19 جولائی 2021

اسلام آباد( سچ خبریں) وزیراعظم کےنمائندہ خصوصی حافظ طاہر محمود اشرفی کا کہنا ہے کہ پاکستان ، افغانستان میں امن کا خواہاں ہے، افغانستان کا امن پاکستان کا امن ہے۔ وزیراعظم اور آئی ایس آئی سربراہ نے پوری دنیا پر پاکستان کا مؤقف واضح کردیا ہے۔

انہوں نے کہا کہ ہم افغانستان میں امن کےسہولت کار ہیں، افغانستان میں امن چاہتے ہیں، افغانستان کے سفیر کی بیٹی ہماری بیٹی ہے، وزارت داخلہ و خارجہ کا جو مؤقف ہے وہ پوری پاکستانی قوم کامؤقف ہے، افغانستان کا امن پاکستان کا امن ہے۔

انہوں نے اسلام آباد میں پریس کانفرنس میں کہا کہ کورونا کی شرح میں دن بدن اضافہ ہورہا ہے، شہریوں سےگزارش ہےکہ کورونا ایس اوپیز پر عمل کریں۔حافظ طاہر اشرفی نے کہا کہ کورونا سے نجات کے دو ہی راستے ہیں، اللہ تعالی کی ذات پر توکل کرتے ہوئے احتیاطی تدابیر اختیار کرنا اور  ویکسین لگوانا۔

انہوں نے واضح کیا کہ ویکسین لگوانا جائز ہے،  نمائندہ خصوصی نے علماکرام سے اپیل کی کہ نماز کے اجتماعات میں کورونا ایس اوپیز کے حوالے سے بیان کریں۔طاہراشرفی نے کہا کہ محرم الحرام کے حوالےسےتمام مکاتب فکر کے علما،مشائخ کےساتھ رابطے میں ہیں۔ عید کے بعد محرم میں امن وامان کے حوالےسے علما کا وفد پنجاب بھرکا دورہ کریگا، وفد 26 جولائی کو وزیراعلی پنجاب سے ملاقات کرےگا۔

حافظ طاہر اشرفی نے کہا کہ سعودی حکومت نےحج کیلئے جو اقدامات کیے اس پران کا شکریہ ادا کرتے ہیں۔انہوں نے کہا کہ ہم پاکستان میں امن کے سہولت کار ہیں،وزیراعظم اور آئی ایس آئی سربراہ نے پوری دنیا پر پاکستان کا مؤقف واضح کردیا ہے، مستقبل کےمعاملات پر ہماری وزارت خارجہ کی پوری نظر ہے۔