افغانستان میں امن سے خطے میں خوشحالی آئے گی:صدرمملکت

?️ 12 اکتوبر 2021

اسلام آباد(سچ خبریں)صدر مملکت ڈاکٹرعارف علوی نے کہا کہ افغانستان میں امن سے خطے میں خوشحالی آئے گی کاروبارکا راستہ کھلے گا وسطی ایشیائی ریاستوں سے رابطہ قائم ہوسکے گا، دنیا بھر میں مہنگائی بڑھ رہی ہے ، پاکستان دنیا کا واحد ملک نہیں جسے اس چیلنج کا سامنا کرنا پڑرہاہے ۔

صدر مملکت نے افغان حکومت کی تبدیلی میں پاکستان کے کردار کے تاثر کو مسترد کرتے ہوئے کہا کہ ہم صرف انسانی بنیادوں پر طالبان کی مدد کررہے ہیں۔صدرعلوی نے کہا کہ امریکا نے افغانستان سے عجلت میں انخلا کیا ۔

متحدہ عرب امارات کے دورہ کے موقع پر خلیج ٹائمز کو دیئے گئے انٹرویو میں انہوں نے کہا کہ افغانستان میں تباہی کا مطلب پاکستان پر مزید مہاجرین کا بوجھ ہوگا، پڑوسی ملک میں عدم استحکام نہیں چاہتے ، امریکی اور نیٹو افواج 23 کھرب ڈالر خرچ کرنے کے باوجود افغانستان میں استحکام نہ لاسکیں تو پھر پاکستان کیلئے یہ کرنا کیسے ممکن ہوگا۔

صدر علوی نے ایٹمی سائنسدان ڈاکٹر عبدالقدیر خان کے انتقال پر گہرے دکھ اور افسوس کا اظہار کرتے ہوئے کہا کہ قوم ان کی خدمات کو کبھی فراموش نہیں کرے گی۔ صدر مملکت نے کہا کہ پاکستان سرمایہ کاری کو راغب کرنے میں متحدہ عرب امارات کے ماڈل پر عمل کرنا چاہتا ہے ، کراچی میں اوورسیز انویسٹرز چیمبر آف کامرس اینڈ انڈسٹری (او آئی سی سی آئی) کے وفد سے گفتگو کرتے ہوئے صدر مملکت نے کہا کہ ملک کے وسائل کا موثر انتظام اور کاروبار میں آئی ٹی پر مبنی طریقے اپنانے سے مثبت نتائج برآمد ہو سکتے ہیں ۔