افغانستان سے جنگ نہیں چاہتے، ایران پر جارحیت کی مذمت کرتے ہیں۔ رانا ثناءاللہ

?️ 21 مارچ 2026

اسلام آباد (سچ خبریں) وزیراعظم کے مشیر رانا ثناء اللہ نے کہا ہے کہ پاکستان افغانستان پر جنگ مسلط نہیں کرنا چاہتا، افغانستان سے ایک ہی مطالبہ ہے کہ اپنی سرزمین دہشت گردی کے لیے استعمال نہ ہونے دے۔

مشیر وزیراعظم رانا ثناء اللہ نے کہا کہ اس وقت پاکستان کو پوری دنیا میں اہم مقام حاصل ہے، پاکستان نے ایران پر ہونے والی جارحیت کی واضح مذمت کی، پاکستان نےسپریم لیڈر آیت اللہ خامنہ ای کی شہادت پر اظہار افسوس کیا، پاکستان کی قیادت نے ہرجگہ حق اور سچ کا مؤقف اختیار کیا، پاکستان اس وقت عالم اسلام میں اتفاق،امیداور اتحاد کی علامت ہے۔

انہوں نے کہا کہ افغانستان دوحہ معاہدے کا پابند ہے، پاکستان افغانستان پرجنگ مسلط نہیں کرنا چاہتا، پاکستان افغانستان کے کسی حصے پر قبضہ نہیں کرنا چاہتا، افغانستان اپنی سرزمین کو پاکستان کے خلاف دہشتگردی کیلئے استعمال نہ ہونے دے، پاکستان کا جائزمطالبہ بین الاقوامی قوانین کے مطابق ہے۔

انہوں نے مزید کہا کہ آپریشن غضب للحق دہشتگردی کے خلاف کیا جارہا ہے، آپریشن غضب للحق ایک انٹیلی جنس آپریشن ہے، افغانستان میں دہشتگردوں کو ٹریننگ دی جاتی ہے۔

رانا ثناء اللہ نے کہا کہ 9مئی ہم تو نہیں کیا تھا، 9مئی کی سزائیں عدالتوں سے مل رہی ہیں، ملکی دفاعی اداروں پر حملے کیے گئے، بانی پی ٹی آئی کے خلاف کیسز آپ کے سامنے ہیں، 190ملین پاؤنڈ کیس سے سب واقف ہیں، جن کو 9مئی کی سزائیں ہوئیں وہ اپیل کا حق رکھتے ہیں۔