صہیونی فوج کے ہاتھوں 6 فلسطینی گرفتار، 3 زخمی

?️ 2 مارچ 2023

سچ خبریں:فلسطینی قیدیوں کی نگراں کمیٹی نے اعلان کیا ہے کہ مغربی کنارے کے شہر اریحا پر صہیونی فوج کے حملے میں 6 فلسطینیوں کو گرفتار کر لیا گیا ہے۔

فلسطینی ذرائع ابلاغ کی رپورٹ کے مطابق فلسطینی قیدیوں کی نگراں کمیٹی نے اعلان کیا ہے کہ مغربی کنارے کے شہر اریحا میں واقع عقبہ جبر کیمپ پر صہیونی فوج کے حملے میں 6 فلسطینیوں کو گرفتار کر لیا گیا ہے۔

یاد رہے کہ دو روز قبل اریحا میں فلسطینیون نے صیہونی مخالف فائرنگ کی دو کاروائیاں انجام دیں جس کے نتیجے میں ایک امریکی صیہونی شہری ہلاک ہوا اور متعدد صیہونی زخمی ہوئے، تاہم اس کے بعد سے اریحا پر صیہونی افواج کے حملوں میں شدت آگئی ہے۔

درایں اثنا اریحا شہر کے قریب صیہونی فوجیوں اور فلسطینی شہریوں کے درمیان تصادم میں 3 فلسطینی زخمی ہوگئے جس کے بعد فلسطینی ہلال احمر نے اعلان کیا کہ اریحا شہر کے اطراف میں ہونے والی جھڑپوں میں اسرائیلی فوجیوں کے ہاتھوں 3 فلسطینی زخمی ہوئے جنہیں علاج کے لیے ہستپال منتقل کیا گیا ہے۔

واضح رہے کہ اس وقت جبکہ صیہونی انتہاپسند کابینہ کی وجہ سے صیہونی ریاست اندر سے ٹوٹ رہی ہے اور خانہ جنگی کی طرف بڑھ رہی ہے جسے روکنے کے لیے صیہونی حکام بے بس نظر آرہے ہیں یہی وجہ ہے کہ بوکھلاہٹ کا شکار ہو رہے ہیں اور اپنا غصہ نہتے فلسطینیوں پر نکال رہے کہ جس کی مثال حالیہ ہی میں صیہونی جارح فوج کے ہاتھوں 10 فلسطنیوں کے شہید کیے جانے میں مل سکتی ہے۔