افغانستان سے تجارت سے زیادہ اہم پاکستانی کی جان بچانا ہے، سرحدی راہداریاں بند رہیں گی۔ دفترخارجہ

?️ 24 اکتوبر 2025

اسلام آباد (سچ خبریں) ترجمان دفتر خارجہ طاہر اندرابی نے کہا ہے کہ افغان سرحدی راہداریاں بند رہیں گی، اشیا کی آمدو رفت اور تجارت سے زیادہ اہم ایک عام پاکستانی کی جان بچانا ہے۔

ترجمان نے بتایا کہ دوحہ مذاکرات میں ایک تحریری دستاویز پر اتفاق رائے اور دستخط ہوئے ہیں، تاہم اگر افغان طالبان اسے معاہدہ تسلیم کریں یا نہ کریں، اس سے پاکستان کے مؤقف پر کوئی فرق نہیں پڑتا۔ افغانستان کیساتھ کل دوبارہ مذاکرات ہونگے۔ انہوں نے مطالبہ کیا کہ افغانستان دوحہ مذاکرات میں کیے گئے وعدوں پر عملدرآمد کرے۔

ترجمان دفتر خارجہ نے پریس بریفنگ کے دوران بتایا کہ دوحہ مذاکرات کے تحت افغانستان کی صورتحال پر نظر رکھے ہوئے ہیں۔ ان کا کہنا تھا کہ دریائے کنڑ سے متعلق پاکستان عالمی قوانین کی مکمل پاسداری کرے گا۔ افغان طالبان کی جانب سے چترال سے نکلنے والے دریائے کنڑ پر ڈیم بنانے کے اعلان پر بھی پاکستان نے تشویش کا اظہار کیا ہے۔

بھارت اور افغانستان کے تعلقات پر بات کرتے ہوئے ترجمان نے کہا کہ بھارت کا افغانستان میں سفارتخانہ کھولنا دونوں ممالک کا اندرونی معاملہ ہے، تاہم بھارت کا افغانستان میں کردار ماضی میں زیادہ مثبت نہیں رہا۔

ترجمان کا کہنا تھا کہ پاکستان مغربی کنارے کے انضمام کے اسرائیلی منصوبے کی مذمت کرتا ہے، اسرائیلی پارلیمنٹ کی متنازع قانون سازی عالمی قوانین کی صریحاً خلاف ورزی ہے، پاکستان آزاد اور خودمختار فلسطینی ریاست کے قیام کی حمایت جاری رکھے گا۔