تیونس میں ریفرنڈم 25 جولائی کو اور پارلیمانی انتخابات 17 دسمبر 2022 کو ہوں گے: تیونسی صدر

?️ 14 دسمبر 2021

سچ خبریں:تیونس کے صدر نے اعلان کیا کہ اس ملک میں ریفرنڈم 25 جولائی کو ہوگا جبکہ پارلیمانی انتخابات 17 دسمبر 2022 کو ہوں گے۔
تیونس کے صدر قیس سعید نے کل رات ایک تقریر میں اس ملک کے نئے انتخابی قانون کے تحت ریفرنڈم اور پارلیمانی انتخابات کی تاریخ کو معین کرتے ہوئے کہا کہ ریفرنڈم 25 جولائی کو ہوگا جبکہ پارلیمانی انتخابات 17 دسمبر 2022 کو ہوں گے۔

واضح رہے کہ جولائی کے اواخر سے تیونس میں سیاسی بحران اور بگڑتی ہوئی معاشی صورتحال نیز کورونا وائرس کی وبا سے جڑے مسائل پر بڑے پیمانے پر عوامی مظاہروں کا سامنا ہے، تیونس کے صدر نے 3 اگست کو هشام المشیشی کو وزیر اعظم کے عہدے سے برطرف کرتے ہوئے پارلیمنٹ کو معطل کر دیا تھا اور اس کے ارکان کے سیاسی استثنیٰ کو بھی منسوخ کر دیا تھا۔

قیس سعید نے یہ اقدام ملک میں کورونا وبا سے متاثرہ افراد کی تعداد میں نمایاں اضافے اور حکومتی کارکردگی نیز معاشی مسائل پر عوام کے غصے میں اضافے کا باعث بننے والے مظاہروں کے ایک روز بعد کیا ، تیونس کے صدر کی جانب سے آئین کے بیشتر ابواب کو معطل کرنے کے حکم کے بعد تیونس کی سیاسی جماعتوں اور سیاست دانوں نے قیس سعید کی مخالفت کی تھی اور تیونس کی بڑی سیاسی جماعتوں بشمول اسلام پسند النہضہ پارٹی نے قیس سعید کے اقدامات کو ملک میں جمہوری عمل کے خلاف بغاوت قرار دیا تھا۔