اسٹریٹ کرائم مسئلہ ہے،وزیراعلی سندھ

🗓️ 10 اکتوبر 2022

کراچی: (سچ خبریں) وزیراعلی سندھ سید مراد علی شاہ نے کہاہے کہ اسٹریٹ کرائم مسئلہ ہے،جس کے خاتمے کیلئے پولیس اقدامات کر رہی ہے،میں روزانہ کی بنیاد پر کرائم کی صورتحال مانیٹر کرتا ہوں۔وزیراعلیٰ سندھ سید مراد علی شاہ نے گزشتہ روز12 ربیع الاول کی مناسبت سے میمن مسجد تا لائٹ ہائوس تک جلوس کی قیادت کی۔

حضور پاک ﷺ پر درود شریف کے ورد اور نعتوں سے جلوس آگے بڑھتا رہا۔ وزیراعلی سندھ کے ساتھ صوبائی وزرا، سعید غنی، سید ناصر شاہ، مشیر قانون مرتضی وہاب اور معاون خاص شہزاد میمن جلوس میں تھے۔ وزیراعلی سندھ نے جماعت اہلسنت کے جلوس کی بھی قیادت کی۔ میڈیا سے گفتگو کرتے ہوئے وزیراعلی سندھ سید مراد علی شاہ نے پورے عالم اسلام کو عید میلادالنبی ﷺ کی مبارکباد پیش کی۔

وزیراعلی سندھ نے مسلمانوں کو پاکستان کی سالمیت، سیلابی صورتحال کی تباہ کاریوں کے نقصانات کے خاتمے اور سندھ کی خوشحالی کیلئے دعا کی اپیل کی ۔ وزیراعلی سندھ نے کہا کہ اللہ پاک کشمیر اور فلسطین کے مظلوم لوگوں کی مشکلات کو آسان کرے۔سید مراد علی شاہ نے کہا کہ ہماری پولیس اور دیگر اداروں نے دہشت گردی کے خلاف سخت محنت کی ہے۔ پولیس نے دہشت گرد گرفتار بھی کیے ہیں اور مقابلوں میں ہلاک بھی کئے ہیں۔وزیر اعلی سندھ نے کہاکہ کراچی 2 کروڑ سے زائد کی آبادی کا شہر ہے، 5 سے 6 سال پہلے اسے دنیا کا چھٹا خطرناک شہر قرار دیا گیاتھا۔انہوں نے کہا کہ آج بھی اسٹریٹ کرائم کا مسئلہ ضروری ہے، جس پر اجلاس کر رہے ہیں، کراچی پولیس کو ہدایت کی ہے جلد اس معاملے میں بہتری لے کر آئیں گے۔