اسلام آباد(سچ خبریں)اسلامی نظریاتی کونسل کے چیئرمین ڈاکٹر قبلہ ایاز نے 27 رمضان المبارک کو مسجد نبوی میں غنڈہ گردی کے واقعے کی مذمت کرتے ہوئے کہا ہے کہ یہ مقدس مقام کی صریح بے حرمتی ہے۔
میڈیا کی رپورٹ کے مطابق گزشتہ روز جاری کردہ ایک بیان میں ڈاکٹر قبلہ ایاز نے کہا کہ اس واقعہ کی مذمت کی جانی چاہیے جس نے تمام مسلمانوں کو دکھ پہنچایا۔
سی آئی آئی کے چیئرمین نے کہا کہ ملک کو ایک نئے سیاسی چارٹر کی ضرورت ہے جس کے تحت تمام سیاسی جماعتیں نظریہ پاکستان کے پیغام پر متفق ہوں اور لوگوں میں نفرت اور عدم برداشت پیدا کرنے اور مذہب کی توہین کی بجائے سیاسی اختلافات کو قوم کی تعمیر و ترقی کے لیے استعمال کیا جائے۔
انہوں نے کہا کہ بحیثیت قوم اپنے اختلافات کو اس حد تک لے جانا ہمارے لیے باعث شرم ہے کہ خانہ کعبہ کے بعد دوسرے معزز ترین مقام کے تقدس کو بھی مدنظر نہیں رکھا گیا، انہوں نے مزید کہا کہ سیاسی جماعتوں کو ملک میں رواداری اور شائستگی کے کلچر کو فروغ دینا چاہیے۔
انہوں نے کہا کہ سیاسی اختلافات کو اس حد تک نہ بڑھایا جائے کہ لوگ مسجدوں اور گلیوں میں جھگڑنے لگیں۔
ڈاکٹر قبلہ ایاز نے کہا حضور صلی اللہ علیہ وسلم کی بارگاہ میں اونچی آواز میں بات کرنا منع ہے اور اس طرح کے واقعات کو حرمت کی خلاف ورزی سمجھا جاتا ہے۔
اسلامی نظریاتی کونسل نے نہ صرف اسلامی مقامات اور مقدسات کی بے حرمتی کو شریعت کے اصولوں کے خلاف قرار دیا تھا بلکہ کونسل کے مذہبی ماہرین دوسرے مذاہب کے مقدس مقامات کی خلاف ورزی کو بھی حرام قرار دے چکے ہیں۔
انہوں نے حکام سے مطالبہ کیا کہ مسجد نبوی کے تقدس کو پامال کرنے والوں کو سزا دینے کے لیے تمام دستیاب وسائل بروئے کار لائے جائیں۔
