لاہور (سچ خبریں) وزیراعلیٰ پنجاب سردار عثمان بزدار نے کہا ہے کہ اسرائیلی درندگی کو روکنا عالمی برادری کا فرض ہے ،پاکستانی قوم کل بھی فلسطینی عوام کے ساتھ تھی، آج بھی ان کے ساتھ ہے او رہمیشہ ساتھ رہے گی۔ اسرائیلی اشتعال انگیزیوں کے خطرناک نتائج سامنے آسکتے ہیں۔
ان کا کہناتھا کہ نہتے فلسطینیوں پر اسرائیل کی بمباری ظلم کی انتہا ہے۔ نہتے فلسطینیوں پر ظلم ڈھایا جا رہا ہے اور اسرائیلی درندگی کو روکنا عالمی برادری کا فرض ہے لہٰذا صورتحال کو مزید گھمبیر ہونے سے بچانے کے لیے عالمی برادری کو جاگنا ہوگا۔
انہوں نے کہا کہ فلسطین میں اسرائیلی مظالم روکنے کے لیے عالمی برادری فوری اقدامات کرے کیونکہ بڑھتی ہوئی اسرائیلی اشتعال انگیزیوں کے خطرناک نتائج سامنے آ سکتے ہیں۔ انہوں نے کہا کہ مسئلہ فلسطین اور مسئلہ کشمیر کے پائیدار حل تک عالمی امن خطرے میں ہے۔
دسری جانب گورنر پنجاب چودھری محمد سرور نے کہا ہے کہ تمام اسلامی ممالک کو فلسطین کے معاملے پر متحد ہونا پڑے گا، مسئلہ فلسطین اور کشمیر حل کئے بغیر دنیا میں امن قائم نہیں ہوسکتا۔ذرائع کے مطابق گورنر پنجاب نے فلسطین، مراکش اور مصر کے سفیروں سے ملاقاتیں کیں اور فلسطین میں جاری صورتحال پر تبادلہ خیال کیا۔
جبکہ یورپی پارلیمنٹ کے نائب صدر ڈاکٹر فابیوسے ٹیلی فونک رابطہ کیا۔ ڈاکٹر فابیو نے فلسطین میں انسانی حقوق کی پامالی رکوانے میں اپنا کردار ادا کرنے کی یقین دہانی کرائی۔ گورنر چودھری محمد سرور نے کہا کہ پاکستان مشکل کی اس گھڑی میں فلسطینی بھائیوں کے ساتھ کھڑا ہے۔
فلسطینی سفیراحمد ربعی نے گورنر پنجاب سے ملاقات میں کہا کہ پاکستان کی عوام کی حمایت فلسطینیوں کے لیے نہایت اہمیت رکھتی ہے۔ نائب صدر یورپی پارلیمنٹ کا کہنا تھا کہ انسانی حقوق اور امن کے تحفظ کو یقینی بنانا ہماری بھی ترجیح ہے۔
