اسد عمرکا ملک میں کورونا کی بگرٹی صورتحال پر تشویش کا اظہار

?️ 19 اپریل 2021

اسلام آباد(سچ خبریں) وفاقی وزیر اور این سی او سی کے سربراہ اسد عمر نے ملک میں کورونا کی بگڑتی صورتحال پر تشویش کا اظہار کرتے ہوئے کہا کہ کورونا وائرس کے تشویشناک مریضوں کی تعداد ساڑھے 4 ہزار تک جاپہنچی ہے، آکسیجن کی فراہمی اس وقت دباؤ کا شکار ہے، اسپتال کورونا کے مریضوں سے مسلسل بھر رہے ہیں۔

تفصیلات کے مطابق اپنے بیان میں اسد عمر نے کہا کہ اسپتال مسلسل بھر رہے ہیں اور کورونا کے تشویشناک مریضوں کی تعداد 4500 تک پہنچ گئی ہے، تشویشناک مریضوں کی موجودہ تعداد گزشتہ سال کی سب سے زیادہ تعداد سے 30 فیصد زائد ہے جب کہ آکسیجن کی فراہمی اس وقت دباؤ کا شکار ہے۔

انہوں نے کہا کہ ایس او پیز پر عملدرآمد کم ہورہا ہے، ہم ایس او پیز پر عملدرآمد نا کرکے بہت بڑی غلطی کررہے ہیں، جب سے کورونا آیا ہے اب ہم متاثرین کی تعداد بہت خراب دیکھ رہے ہیں اور ہمارا ہمسایہ ملک شدید بحران میں ہے۔

اسد عمر کا کہنا تھا کہ ایران میں روزانہ 300 سے زائد اموات اور بھارت میں روزانہ 1600 سے زائد اموات ہورہی ہیں، ہمیں پہلے سے زیادہ حفاظتی اقدامات کرنا ہوں گے۔ این سی او سی کے مطابق گزشتہ 24 گھنٹوں میں پاکستان میں کورونا وائرس سے مزید 73 افراد انتقال کرگئے ہیں، 18 اپریل کو 60 ہزار 162 کورونا ٹیسٹ کیے گئے، 5 ہزار 152 نئے مریض سامنے آئے جبکہ مثبت کیسز کی شرح ساڑھے 8فیصد رہی۔