سینیئر اداکار طلعت حسین میں ڈیمینشیا کی تصدیق

?️ 30 جنوری 2024

کراچی: (سچ خبریں) اداکار فیصل قریشی اور ان کی اہلیہ ثنا قریشی نے تصدیق کی ہے کہ سینیئر اداکار طلعت حسین ڈیمینشیا کا شکار ہیں۔

فیصل قریشی اہلیہ کے ہمراہ 30 جنوری کو طلعت حسین کی عیادت کے لیے گئے اور انہوں نے سینیئر اداکار سے ملاقات کی ویڈیوز بھی شیئر کیں۔

فیصل قریشی کی جانب سے طلعت حسین سے ملاقات کی شیئر کی گئی ویڈیو میں سینیئر اداکار کو باتیں کرتے دیکھا جا سکتا ہے، تاہم ان کی باتوں سے اندازہ ہوتا ہے کہ وہ زیادہ تر باتیں اور چیزیں بھول چکے ہیں۔

ویڈیو میں طلعت حسین بیماری کے باعث کمزور بھی دکھائی دیتے ہیں۔

فیصل قریشی کی اہلیہ نے بھی سینیئر اداکار کے ساتھ ملاقات کی ویڈیو شیئر کی، جس میں انہوں نے طلعت حسین میں ڈیمینشیا کے مرض کی تصدیق کی۔

انہوں نے اپنی پوسٹ میں بتایا کہ ڈیمینشیا میں مبتلا ہونے کے باوجود طلعت حسین ان سے ملے اور ان کے ساتھ اچھی باتیں کیں۔

فیصل قریشی اور ان کی اہلیہ کی پوسٹس پر شوبز شخصیات اور مداحوں نے کمنٹس کرتے ہوئے طلعت حسین کی صحت یابی کے لیے دعائیں کیں۔

گزشتہ ہفتے طلعت حسین کی صاحبزادی اداکارہ تزئین حسین نے میڈیا کو بتایا تھا کہ اداکار کی ذہنی حالت انتہائی خراب ہو چکی ہے، وہ لوگوں کو پہچاننے سے بھی قاصر ہیں۔

انہوں نے بتایا تھا کہ ان کے والد کو باتیں اور چیزیں بھی یاد نہیں رہتیں اور وہ سوالوں کے جوابات دینے کے بھی قابل نہیں۔

انہوں نے واضح نہیں کیا تھا کہ طلعت حسین کو ڈیمینشیا ہوا ہے یا نہیں لیکن اب فیصل قریشی کی اہلیہ نے اپنی پوسٹ میں اداکار میں ذہنی بیماری کی تصدیق کردی۔

اس سے طلعت حسین کی اہلیہ رخشندہ طلعت نے بتایا تھا کہ بہت زیادہ سگریٹ نوشی کرنے کی وجہ سے ان کے شوہر کے پھیپھڑے کمزور ہوچکے ہیں، جن میں بار بار پانی بھر جاتا ہے۔

انہوں نے بتایا تھا کہ پھیپھڑوں سے پانی نکالنے کے لیے انہیں متعدد بار ہسپتال منتقل کیا گیا اور کمزوری کی وجہ سے وہ گھر میں گر بھی پڑے تھے، جس وجہ سے اب وہ ویل چیئر اور بستر تک محدود ہوچکے ہیں اور ان کا گھر پر علاج جاری ہے۔

طلعت حسین کی عمر 80 سال سے زائد ہے اور انہوں نے فنون لطیفہ کو نصف صدی دی ہے، یعنی انہوں نے اپنی عمر کا بیشتر حصہ اداکاری، صداکاری، آرٹ اور فن کو دی۔

طلعت حسین نے 1970 سے قبل کم عمری میں ہی اداکاری شروع کردی تھی لیکن انہیں 1970 کے بعد شہرت ملنا شروع ہوئی۔

لندن سے تعلیم حاصل کرنے والے طلعت حسین نے پاکستان ٹیلی وژن (پی ٹی وی) سے اداکاری کا آغاز کیا اور انہوں نے برطانوی ٹی وی سمیت بولی وڈ فلموں میں بھی کام کیا۔

خیال رہے کہ ڈیمینشیا کا مرض دماغ پر اثر انداز ہوتا ہے، یاداشت ختم ہوجاتی ہے اور ایک خاص قسم کا پروٹین اسے متحرک کرنے کا باعث بنتا ہے۔

’ڈیمینشیا‘ دماغی تنزلی یا غیر فعالیت کی بیماری ’الزائمر‘ کی شاخ ہے، اس طرح کی درجنوں بیماریاں ہیں جو ڈیمینشیا اور الزائمر کی شاخ ہیں۔

اکثر یہ معمر افراد کو شکار بناتا ہے مگر کسی بھی عمر کے افراد کو یہ مرض لاحق ہوسکتا ہے

ڈیمینشیا اور الزائمر جیسی بیماریوں سے متاثر شخص، انسانوں، الفاظ اور مقامات کو یاد نہیں رکھ پاتے جب کہ دیگر ذہنی و دماغی بیماریوں میں بھی ایسا ہوتا ہے۔