ٹویٹر کا صارفین کے لیے ایک اور زبردست فیچرمتعارف کرانے کا اعلان

🗓️ 7 جولائی 2021

کیلی فورنیا(سچ خبریں) سماجی رابطے اور مائیکروبلاگنگ پلیٹ فارم ٹویٹر نے صارفین کے لیے ایک اور زبردست سہولت متعارف کرانے کا اعلان کردیا۔ اس سہولت کے تحت کوئی بھی صارف آڈیو روم (اسپیس) بنا کر کسی بھی موضوع پر گفتگو کے لیے اپنے دوستوں کو مدعو کرسکتا ہے۔

سماجی رابطوں کے پلیٹ فارمز میں منفرد حیثیت رکھنے والی کمپنی ٹویٹر کی جانب سے صارفین کی دلچسپی کو مزید بڑھانے کے لیے آئے روز نئی سہولیات متعارف کرائی جاتی ہیں۔ٹویٹر نے دو ماہ قبل اپنے پلیٹ فارم پر آڈیو رومز بنانے کی سہولت متعارف کرائی، جو پہلے آئی او ایس پھر آئی فون صارفین کے لیے پیش کی گئی۔

اس سہولت کے تحت کوئی بھی صارف آڈیو روم (اسپیس) بنا کر کسی بھی موضوع پر گفتگو کے لیے اپنے دوستوں کو مدعو کرسکتا ہے، جس میں اسپیس بنانے والا ہوسٹ جبکہ 8 افراد اجازت کے بعد بیک وقت مائیک استعمال کرسکتے ہیں۔

ٹویٹر کا اسپس کا تجربہ اس قدر کامیاب رہا کہ چند دنوں میں اس سروس کو استعمال کرنے والے صارفین کی تعداد میں لاتعداد اضافہ ہوا جس کے بعد کمپنی نے صارفین کو متاثر کرنے کے لیے اسپیس بنانے والوں کو رقم دینے کا اعلان بھی کیا۔

اب ٹویٹر نے اسپیس بنانے اور استعمال کرنے والے صارفین کے لیے ایک اور زبردست سہولت متعارف کرائی، جس کے تحت وہ آڈیو روم کو اپنی مرضی کی تاریخ اور وقت پر شیڈول کرسکتے ہیں۔ میزبان (ہوسٹ) کو اس اسپیس کا عنوان اور تفصیلات (ڈسکرپشن) تبدیل کرنے کا اختیار بھی ہوگا۔