صیہونی وزیر جنگ کی انصار اللہ کے رہنما کے قتل کی دھمکی

سچ خبریں:صیہونی وزیر جنگ یسرائیل کاٹز نے دعویٰ کیا ہے کہ اسرائیل، یمن میں انصار اللہ کے رہنما عبدالملک الحوثی کو تعاقب اور ٹارگٹ کلنگ کا نشانہ بنائے گا، جیسا کہ اس نے دیگر مزاحمتی رہنماؤں کے ساتھ کیا ہے۔

الجزیرہ اور صیہونی فوجی ریڈیو کی رپورٹ کے مطابق اسرائیل کے وزیر جنگ یسرائیل کاتز نے کہا ہے کہ ان کا ملک یمن میں انصار اللہ کے رہنما عبدالملک بدرالدین الحوثی کو تعاقب کر کے قتل کرے گا، بالکل اسی طرح جیسے اسرائیل نے دیگر مزاحمتی رہنماؤں کو نشانہ بنایا۔

یہ بھی پڑھیں:یمن پر حملے میں صیہونی حکومت کے چیلنجز

رپورٹ کے مطابق یسرائیل کاٹز نے دعویٰ کیا کہ اسرائیل نے پہلے بھی غزہ میں یحیی السنوار، ان کے بھائی اور محمد الضیف، تہران میں اسماعیل ہنیہ اور لبنان میں سید حسن نصر اللہ کو قتل کیا ہے،انہوں نے مزید کہا کہ اگر حوثی اسرائیل پر اپنے حملے جاری رکھتے ہیں تو ان کے رہنما بھی ہدف بنیں گے۔

کاٹز نے مزید کہا کہ اسرائیلی فوج نے حوثی کنٹرول والی بندرگاہوں پر فضائی حملے کیے ہیں اور بھاری نقصان پہنچایا ہے، انہوں نے دھمکی دی کہ اگر یمن سے اسرائیل پر میزائل حملے جاری رہے تو اس کے جواب میں مزید شدید کارروائی ہوگی۔

مزید پڑھیں:اسرائیل یمن میں لبنان کے منظر نامے پر عمل درآمد کیوں نہیں کر سکتا؟

یہ بیانات ایسے وقت میں سامنے آئے ہیں جب اسرائیل نے یمن کے الحدیدہ اور الصلیف بندرگاہوں پر فضائی حملے کیے جس کے ردعمل میں یمنی عوام نے لاکھوں کی تعداد میں مظاہرے کر کے فلسطین اور غزہ کے ساتھ اپنی حمایت کا اعادہ کیا ہے۔