صیہونی کنسٹ کی مغربی کنارے اور وادی اردن پر قبضے کے منصوبے کی منظوری

سچ خبریں:صیہونی پارلیمنٹ کنسٹ نے مغربی کنارے اور وادی اردن پر صہیونی حاکمیت کے نفاذ کے متنازع منصوبے کو منظور کر لیا۔ یہ فیصلہ فلسطینی علاقوں پر اسرائیلی توسیع پسندی کے ایک نئے مرحلے کی علامت ہے۔

الجزیرہ نیوز چینل کی رپورٹ کے مطابق صیہونی ذرائع ابلاغ نے اطلاع دی ہے کہ صہیونی پارلیمنٹ "کنسٹ” نے ایک متنازع قانون کی منظوری دی ہے جس کے تحت اسرائیلی خودساختہ حاکمیت کو مغربی کنارے اور وادی اردن تک توسیع دی جائے گی۔

یہ بھی پڑھیں:اسرائیلی پارلیمنٹ میں مغربی کنارے کے الحاق کے قانون کی منظوری کے خلاف مذمت کی لہر

اس قانون کو کنسٹ کے 71 ارکان نے منظور کیا، جو کہ قابض حکومت کے فلسطینی علاقوں میں توسیع پسند عزائم کا واضح اظہار ہے۔

یہ منصوبہ حاکم صہیونی اتحاد نے کنسٹ کی تعطیلات سے قبل پیش کیا، جس کا مقصد ان علاقوں پر "صیہونی تسلط” کو قانونی شکل دینا ہے جہاں لاکھوں فلسطینی بستے ہیں۔

صیہونی وزیر توانائی ایلی کوہن نے سوشل میڈیا پلیٹ فارم ایکس(سابقہ ٹوئٹر) پر بیان جاری کرتے ہوئے کہا کہ میں اس تاریخی منصوبے کی مکمل حمایت کرتا ہوں جو مغربی کنارے پر ہماری حاکمیت سے متعلق ہے۔ وقت آ گیا ہے کہ ہم اس علاقے پر اپنا تسلط قائم کریں۔

یہ صورتحال ایک ایسے وقت میں پیش آئی ہے جب اسرائیل کی غزہ پر فوجی جارحیت جاری ہے، اور ساتھ ہی مغربی کنارے میں بھی اسرائیلی قابض افواج کے حملے اور چھاپے شدت اختیار کر چکے ہیں۔

 ماہرین کے مطابق، یہ منصوبہ سابق امریکی صدر ڈونلڈ ٹرمپ کی مکمل حمایت سے تقویت پا رہا ہے، جن کے دور میں اسرائیل کو فلسطینی علاقوں پر حاکمیت بڑھانے کی کھلی چھوٹ ملی۔

مزید پڑھیں:اسرائیلی کنیسٹ نے مغربی کنارے میں توسیع پسندانہ منصوبے کو منظوری دے دی

سیاسی تجزیہ نگاروں کا کہنا ہے کہ اس قانون کی منظوری فلسطین میں زمینی حقائق کو یکطرفہ طور پر بدلنے کی صہیونی کوشش کا حصہ ہے، جو بین الاقوامی قوانین اور اقوام متحدہ کی قراردادوں کے سراسر منافی ہے۔