صیہونی حکومت کو حقیقی سونامی کا سامنا؛صیہونی اخبار کا اعتراف 

سچ خبریں:صیہونی اخبار یدیعوت احرونٹ نے اعتراف کیا ہے کہ تل ابیب کو عالمی سطح پر شدید بحران اور حقیقی سونامی کا سامنا ہے، اسرائیل کی عالمی پوزیشن کم ترین سطح پر آگئی، بڑے ممالک نے بھی تعلقات محدود یا معطل کردیے ہیں۔

الجزیرہ نیوز چینل کی رپورٹ کے مطابق عبرانی زبان کے معروف اخبار یدیعوت احرونٹ نے اپنی ایک رپورٹ میں اس بات کا اعتراف کیا ہے کہ اسرائیل اس وقت اپنی تاریخ کے بدترین عالمی بحران اور حقیقی سونامی کا شکار ہے۔

یہ بھی پڑھیں:کیا صیہونی حکومت کا اندرونی بحران نومبر 1995 کے واقعے کو دہرانے کا باعث بنے گا؟

رپورٹ کے مطابق، صیہونی اخبار نے انکشاف کیا ہے کہ صہیونی ریاست اپنی بین الاقوامی حیثیت کے سب سے نچلے درجے پر پہنچ چکی ہے۔

صیہونی وزارت خارجہ کے ایک اعلیٰ عہدیدار کے مطابق، تل ابیب اس وقت ایک حقیقی سونامی کا سامنا کر رہا ہے جس کی شدت ہر گزرتے دن کے ساتھ بڑھتی جا رہی ہے۔

رپورٹ میں بتایا گیا کہ برطانیہ کے ساتھ فری ٹریڈ ایگریمنٹ (آزاد تجارتی معاہدے) کی بات چیت معطل ہونے کے سنگین معاشی نتائج برآمد ہوں گے۔

 اس کے علاوہ، لندن میں اسرائیلی سفیر کو طلب کیا گیا ہے جبکہ برطانیہ، فرانس اور کینیڈا نے بھی اسرائیل کو سخت نتائج کی دھمکی دی ہے، رپورٹ کے مطابق، وائٹ ہاؤس کی طرف سے بھی اب نیتن یاہو حکومت سے کسی بہتری کی امید باقی نہیں رہی۔

اخبار نے اپنی رپورٹ میں مزید لکھا ہے کہ اسرائیل اس وقت ایک ایسے سونامی کا سامنا کر رہا ہے جو ہر لمحہ زیادہ خطرناک ہوتا جا رہا ہے۔

مزید پڑھیں:غزہ جنگ کی وجہ سے صیہونی حکومت میں غذائی بحران

دنیا اب تل ابیب کی حمایت سے دستبردار ہو رہی ہے، اور اسرائیل پر پابندیوں کی لہر خاموشی کے ساتھ پھیل رہی ہے۔ یہاں تک کہ کوئی بھی ملک اب اپنا نام اسرائیل سے منسلک کرنا نہیں چاہتا۔