نیتن یاہو کی جنگ طلبانہ پالیسیوں کے خلاف اسرائیل میں شدید مظاہرے شروع ہوگئے

🗓️ 25 مئی 2021

تل ابیب (سچ خبریں)  اسرائیل میں نیتن یاہو کی جنگ طلبانہ پالیسیوں کے خلاف اسرائیل میں شدید مظاہرے شروع ہوگئے ہیں اور ہزاروں یہودیوں نے اسرائیلی وزیر اعظم بنجمن نیتن یاہو کے خلاف شدید احتجاجی مظاہرہ کیا اور ملک کے امن و امان کو خطرے میں ڈالنے پر استعفے کا مطالبہ کرتے ہوئے کہا کہ نیتن یاہو کے اقتدار میں رہتے ہوئے اسرائیل میں امن و سکون برقرار نہیں ہوسکتا۔

اسرائیل کے عبرانی ذرائع ابلاغ کے مطابق اتوار کے روز تل ابیب میں ہزاروں یہودی آبادکاروں نے وزیراعظم بنجمن نیتن یاہو کے خلاف احتجاجی مظاہرہ کیا اور حماس سے ذلت آمیز شکست کے بعد ان سے عہدہ چھوڑنے کا مطالبہ کیا۔

عبرانی اخبار یدیعوت احرونوت کی ویب سائٹ وائی نیٹ کے مطابق احتجاجی مظاہرہ شاہراہ بالفور پر واقع نیتن یاہو کے دفتر کے سامنے کیا گیا، مظاہرین میں ہزاروں افراد نے شرکت کی، انہوں‌نے اسرائیلی وزیراعظم نیتن یاہو سے عہدہ چھوڑنے کا مطالبہ کیا۔

موصولہ اطلاعات کے مطابق مظاہرین نے ہاتھوں میں بینرز اور کتبے اٹھا رکھے جن پر نیتن یاہو پر  اسرائیلیوں کو جنگ میں جھونکنے کا الزام عاید کیا تھا۔

مظاہرین سے خطاب کرتے ہوئے مقررین کا کہنا تھا کہ نیتن یاہو کے اقتدار میں رہتے ہوئے اسرائیلی امن اور سکون سے نہیں رہ سکتے۔