بھارت میں انسانی حقوق کی پامالیاں جاری، امریکا نے شدید تشویش کا اظہار کردیا

🗓️ 31 مارچ 2021

واشنگٹن (سچ خبریں) بھارت میں جب سے انتہاپسند جماعت بی جے پی برسراقتدار آئی ہے تب سے ملک بھر میں انسانی حقوق کی صورتحال انتہائی خراب ہوگئی ہے اور بھارت بھر میں اقلیتوں پر حملے بھی بڑھ گئے ہیں جس کو دیکھتے ہوئے امریکا نے شدید تشویش کا اظہار کردیا ہے۔

تفصیلات کے مطابق امریکا نے بھارت میں مسلمانوں سمیت دیگر اقلیتوں پر تشدد کے واقعات پر تشویش کا اظہار کرتے ہوئے کہا ہے کہ بھارت میں اقلیتوں کو شدید تشدد کا نشانہ بنایا جارہا ہے جو ایک افسوسناک بات ہے۔

امریکی وزیر خارجہ نے انسانی حقوق سے متعلق سالانہ رپورٹ جاری کرتے ہوئے بتایا کہ بھارت میں مسلمانوں اور نچلی ذات دلت سے تعلق رکھنے والے گروپوں کو سب سے زیادہ خطرات کا سامنا ہے۔

امریکی رپورٹ میں بھارتی وزارت داخلہ کی 2016 سے لیکر 2017 تک کی رپورٹ کے اعداد و شمار کا بھی تذکرہ کیا گیا جس کے مطابق مذکورہ ایک سال کے عرصے میں فرقہ وارانہ فسادات اور مذہبی بنیادوں پر تشدد میں 86 افراد ہلاک اور 2 ہزار 231 زخمی ہوئے۔

انسانی حقوق سے متعلق جاری سالانہ رپورٹ میں دہشتگردوں کیخلاف پاکستانی فورسز کی کارروائی کو سراہا گیا ہے۔

رپورٹ میں اعتراف کیا گیا کہ پاکستان میں شدت پسندوں اور دہشتگرد گروپوں کیخلاف پاکستانی فوج، پولیس اور قانون نافذ کرنے والے ادارے سرگرم ہیں۔