گولی گاڑی کے شیشے کو چیرتی ہوئی میرے شیرخوار بچے کے دل میں جا لگی؛فلسطینی باپ کے الفاظ

?️ 7 جون 2026

سچ خبریں:مغربی کنارے میں صہیونی فوجیوں کی فائرنگ سے سات ماہ کے فلسطینی شیر خوار کی شہادت پر اس کے والد نے دل دہلا دینے والی تفصیلات بیان کی ہیں، صہیونی فوج نے اعتراف کیا ہے کہ اس کے ایک اہلکار نے خاندان کی گاڑی پر فائرنگ کی تھی۔

’’گولی گاڑی کے شیشے کو چیرتی ہوئی میرے شیرخوار بچے کے دل میں جا لگی‘‘ یہ الفاظ اس فلسطینی باپ کے ہیں جس نے صہیونی فوجیوں کی فائرنگ میں اپنے سات ماہ کے شیر خوار بیٹے کو کھو دیا۔

فلسطینی ذرائع ابلاغ کی رپورٹ کے مطابق سات ماہ کے فلسطینی شیر خوار سام ابو ہیکل کے والد فہد ابو ہیکل نے اپنے بیٹے کی شہادت کے المناک لمحوں کی دردناک داستان بیان کی ہے۔

سات ماہ کا سام جمعہ کی شب اپنے والدین کے ہمراہ الخلیل شہر کے قریب سفر کر رہا تھا کہ صہیونی فوجیوں کی فائرنگ کا نشانہ بن گیا۔ ابتدائی تحقیقات کے بعد صہیونی فوج نے اعتراف کیا کہ اس کے ایک اہلکار نے اس خاندان کی گاڑی پر فائرنگ کی، حالانکہ گاڑی میں موجود افراد کے بارے میں کسی قسم کا کوئی شبہ موجود نہیں تھا۔

بیالیس سالہ فہد ابو ہیکل، جن کی اہلیہ بھی اس واقعے میں چہرے پر شدید زخمی ہوئیں اور ہسپتال میں زیر علاج ہیں، نے واقعے کی تفصیل بیان کرتے ہوئے کہا کہ ہم بیت لحم سے الخلیل جا رہے تھے کہ اچانک ایک آواز سنائی دی، جس پر میں نے گاڑی روک دی۔

انہوں نے لرزتی ہوئی آواز میں مزید کہا کہ فوراً فائرنگ شروع ہو گئی۔ ایک لمحے میں میں نے دیکھا کہ ایک گولی سامنے کا شیشہ توڑتے ہوئے میرے بازو میں لگی،دوسری گولی میرے سات ماہ کے بچے کے جسم کو چیرتی ہوئی گزر گئی۔ زخم اتنا گہرا تھا کہ سام ایک لمحہ بھی زندہ نہ رہ سکا۔

فہد ابو ہیکل نے اس واقعے کو حادثاتی قرار دینے کی تردید کرتے ہوئے کہا کہ

جب ایک سے زیادہ گولیاں چلائی جائیں تو اس کا مطلب واضح طور پر نشانہ لے کر فائرنگ کرنا ہوتا ہے۔ یہ سانحہ ہرگز کوئی اتفاقی غلطی نہیں تھا۔

سام کی پینسٹھ سالہ دادی فریال ابو ہیکل، جو اس وقت گاڑی میں موجود تھیں، نے اس دلخراش منظر کو یاد کرتے ہوئے کہا کہ ابتدا میں مجھے لگا کہ یہ ہوائی فائرنگ یا انتباہی گولیاں ہیں، لیکن چند لمحوں بعد میں نے اپنی بہو کی چیخ سنی اور دیکھا کہ وہ خون میں لت پت ہے۔

رپورٹ کے مطابق 7 اکتوبر 2023 کو غزہ جنگ کے آغاز کے بعد سے مغربی کنارے میں صہیونی فوجیوں اور آبادکاروں کے حملوں میں نمایاں اضافہ ہوا ہے۔ ان حملوں اور منظم تشدد کے نتیجے میں اب تک کم از کم 1080 فلسطینی شہید ہو چکے ہیں۔