تل ابیب (سچ خبریں) اسرائیل میں اس وقت ایک شدید خانہ جنگی کا آغاز ہوچکا ہے اور ملک بھر کے لوگوں میں ایک شدید خوف و ہراس اور بے چینی پیدا ہوچکی ہے جبکہ متعدد یہودی اب اسرائیل کو چھوڑ کر دوسرے ملکوں میں نقل مکانی کررہے ہیں جس کو دیکھتے ہوئے اسرائیلی وزیر دفاع نے ایک اہم بیان جاری کرتے ہوئے کہا ہے کہ اسرائیل اندر سے ٹوٹ چکا ہے اور اگر یہ سلسلہ ایسے ہی جاری رہا تو ملک کی سالمیت خطرے میں پڑجائے گی۔
تفصیلات کے مطابق اسرائیلی وزیر دفاع بینی گینٹز نے کہا ہے کہ اسرائیل اگرچہ دنیا کو یہ بتانے کی کوشش کررہا ہے کہ وہ اپنے دشمنوں کے خلاف مضبوط اور طاقت ور ہے لیکن حقیقت یہ ہے کہ ملک اندر سے کمزور، ٹوٹ پھوٹ کا شکار اور زخم رسیدہ ہے، اور اگر ہمیں دشمنوں کا مقابلہ کرنا ہے تو کسی کمزوری کا مظاہرہ کیے بغیر ہمیں اپنے دشمنوں کے خلاف اپنی سلامتی کو مضبوط رکھنا ہوگا۔
موصولہ اطلاعات کے مطابق ایک تقریب سے خطاب کرتے ہوئے بینی گینٹز نے کہا کہ حقیقت یہ ہے کہ ہمارے منتخب ارکان جمہوری تحریکوں کے باعث خطرات میں گھر گئے مگر ہم نے رابین کے قتل سے سبق نہیں سیکھا۔
انہوں نے کہاکہ اسرائیل داخلی سطح پر سیاسی بے چینی کا شکار ہے، نیتن یاہو کی حکومت سازی میں ناکامی کے بعد سیاسی حالات مزید خراب ہوئے ہیں، ان کی حکومت سازی کی کوشش مثبت ہے مگر وہ نفتالی بینیٹ کے ساتھ مل کر حکومت بنانے کی پوزیشن میں نہیں۔
انہوں نے مزید کہا کہ ہمارے لیے سب سے بڑا چینج یہ ہے کہ جس منزل کے حصول کے لیے ہم نے خون اور جانوں کی قربانی دی ہے وہ استقامت ہمارے ہاتھ سے نکل نہ جائے، کیونکہ جس طریقے سے یہودی ملک سے فرار کررہے ہیں اس سے ایسا لگتا ہے کہ اسرائیل عنقریب نابود ہوجائے گا، لہٰذا ہمیں یہودیوں کو اس بات کا یقین دلانا ہوگا کہ ہم آپ کی حفاظت کرسکتے ہیں اور اگر یہ ثابت کرنے میں ناکام ہوگئے تو اسرائیل کا خاتمہ یقینی ہے۔