شام کا ایران اور روس کے ساتھ تعلقات کے بارے میں تازہ ترین موقف

سچ خبریں:شام کے وزیر خارجہ اسعد الشیبانی نے اپنے ملک کی خارجہ پالیسی اور دمشق کے تہران اور ماسکو کے ساتھ تعلقات پر اپنا موقف بیان کیا ہے۔  

یہ بھی پڑھیں: شام کو 4 متحارب ریاستوں میں تقسیم کرنے کا خطرناک منصوبہ

الامارات الیوم کی رپورٹ کے مطابق شام کے وزیر خارجہ اسعد الشیبانی نے کہا کہ ہم نے ایک تباہ شدہ معاشی نظام ورثے میں پایا ہے، جس پر معدوم نظام کی وجہ سے پابندیاں عائد کی گئی تھیں،انہوں نے زور دے کر کہا کہ ان پابندیوں کو ختم کرنا ضروری ہے کیونکہ یہ شام کے عوام پر منفی اثرات مرتب کرتی ہیں۔

انہوں نے عرب ممالک اور عالمی برادری کے ساتھ کی گئی کوششوں کا ذکر کرتے ہوئے کہا کہ ہم امریکہ اور یورپی یونین کو ان پابندیوں کو ختم کرنے کے لیے قائل کرنے کی کوشش کر رہے ہیں۔

انہوں نے کہا کہ شام کی سلامتی کی صورتحال اچھی ہے، لیکن ایک مضبوط فوج کے قیام کے لیے وقت درکار ہے، الشیبانی نے کہا کہ آنے والی حکومت مارچ میں تمام شام کے عوام کی نمائندگی کرے گی اور ہم چاہتے ہیں کہ نئی حکومت عوام کا اعتماد حاصل کرے۔

انہوں نے اردن کے ساتھ تعلقات کو ممتاز قرار دیتے ہوئے کہا کہ ہم نے پہلے موجود خطرات کو ختم کر دیا ہے، الشیبانی نے کہا کہ انہیں عراق سے سرکاری دعوت موصول ہوئی ہے اور وہ جلد ہی بغداد کا دورہ کریں گے۔

روس اور ایران کے ساتھ تعلقات کے بارے میں انہوں نے کہا کہ ہر وہ تعلق جو باہمی احترام اور داخلی معاملات میں مداخلت نہ کرنے پر مبنی ہو، قابل احترام ہے۔

 انہوں نے کہا کہ ماضی کے ورثے کو درست کرنا ہوگا اور شام کے عوام کو روس اور ایران کے ساتھ تعلقات میں احترام محسوس ہونا چاہیے،انہوں نے کہا کہ ایران اور روس کے ساتھ تعلقات کے حوالے سے مثبت پیغامات موصول ہوئے ہیں، لیکن ہم چاہتے ہیں کہ یہ ایک واضح پالیسی میں تبدیل ہو جس پر شام کے عوام کو اعتماد ہو۔

مزید پڑھیں: شام کے بارے میں ایران ، ترکی اور روس کا مشترکہ بیان

لبنان کے بارے میں انہوں نے کہا کہ ہم اسد کے دور کے خراب تعلقات کو برداشت نہیں کریں گے اور لبنان کو ایک ہمسایہ ملک کے طور پر دیکھتے ہیں، اس کی خودمختاری کا احترام کرتے ہیں اور اس کے معاملات میں مداخلت نہیں کرتے۔