سارہ نیتن یاہو کا ایک بار پھر تنازع، سابق صیہونی فوجی عہدیدار پر سنگین الزام

?️ 1 ستمبر 2026

سچ خبریں:سارہ نیتن یاہو نے سابق صیہونی فوجی عہدیدار یائیر گولان پر 7 اکتوبر کے آپریشن طوفان الاقصیٰ سے پہلے ہی اس کی اطلاع ہونے کا الزام عائد کردیا، گولان نے مقدمہ کرنے کا اعلان کیا ہے۔

صیہونی وزیر اعظم نیتن یاہو کی اہلیہ سارہ نیتن یاہو نے ایک سابق صیہونی فوجی عہدیدار پر الزام عائد کرکے ایک بار پھر تنازع کھڑا کردیا ہے۔

ٹائمز آف اسرائیل کے مطابق، صیہونی وزیر اعظم کی اہلیہ سارہ نیتن یاہو نے صیہونی فوج کے سابق نائب چیف آف اسٹاف یائیر گولان پر الزام عائد کیا ہے کہ انہیں طوفان الاقصیٰ آپریشن کے بارے میں پہلے ہی سے علم تھا۔

یائیر گولان نے ان الزامات کو مسترد کرتے ہوئے کہا ہے کہ وہ صیہونی وزیر اعظم کی اہلیہ کے خلاف مقدمہ دائر کرنے کا ارادہ رکھتے ہیں۔

گولان سے وابستہ سیاسی جماعت نے بھی کہا ہے کہ نیتن یاہو حکومت سکیورٹی اقدامات میں ناکامی پر معذرت کرنے کے بجائے اس واقعے کی ذمہ داری سے بچنے کی کوشش کررہی ہے۔

دوسری جانب نیتن یاہو کی کابینہ نے طوفان الاقصیٰ آپریشن کو 3 سال گزرنے کے باوجود ان سکیورٹی خامیوں کی تحقیقات کے لیے ایک سرکاری تحقیقاتی کمیشن کے قیام کی راہ میں رکاوٹیں پیدا کی ہیں جو اس واقعے کا سبب بنیں۔

ایسے میں سارہ نیتن یاہو نے کہا ہے کہ صیہونی عہدیداروں کے درمیان ممکنہ غداری کے معاملے کی تحقیقات کے لیے ایک تحقیقاتی کمیٹی قائم کی جانی چاہیے۔

نیتن یاہو کے اہم سیاسی حریف گادی آیزن کوٹ نے بھی کہا ہے کہ صیہونی وزیر اعظم اسرائیل کی تاریخ کی سب سے بڑی ناکامی سے بچ نکلنے کی کوشش کررہے ہیں۔

ان دنوں سارہ نیتن یاہو اپنے متنازع بیانات اور طرزِ عمل کے باعث صیہونی اور بین الاقوامی میڈیا میں بھی زیر بحث ہیں۔ ان پر شراب نوشی اور ملازمین کے ساتھ نامناسب سلوک سمیت مختلف تنازعات سامنے آتے رہے ہیں۔