جنگ بندی کے باوجود فلسطینیوں کا قتل عام ہو رہا ہے 

?️ 4 جنوری 2026

جنگ بندی کے باوجود فلسطینیوں کا قتل عام ہو رہا ہے

 ملائیشیا کے سابق وزیر اعظم ماہاتیر محمد نے اسرائیل پر شدید تنقید کرتے ہوئے کہا ہے کہ اسرائیلی افواج جنگ بندی کے باوجود فلسطینیوں کا قتل عام جاری رکھے ہوئے ہیں۔ انہوں نے اسرائیلیوں کو “ہیولا” اور “جانوروں سے بھی بدتر” قرار دیا۔

ماہاتیر محمد نے جمعے کے روز سوشل میڈیا پلیٹ فارم ایکس (X) پر لکھا کہ غزہ میں اب تک تقریباً 70 ہزار فلسطینی اسرائیل کے ہاتھوں مارے جا چکے ہیں۔ ان کا کہنا تھا کہ اسرائیلی نہ صرف جنگ کے دوران بلکہ جنگ بندی کے عرصے میں بھی قتل و غارت میں مصروف ہیں۔

انہوں نے مزید کہا کہ اس وقت غزہ کو ادویات اور خوراک کی فراہمی روک دی گئی ہے اور ڈاکٹروں کو بھی غزہ میں داخل ہو کر زخمیوں اور مریضوں کا علاج کرنے سے منع کیا جا رہا ہے، جبکہ اسرائیلی حملوں میں تباہ ہونے والے اسپتال کھنڈرات میں تبدیل ہو چکے ہیں۔

ماہاتیر محمد نے لکھا کہ دنیا یہ سب کچھ دیکھ رہی ہے لیکن کوئی عملی قدم نہیں اٹھا رہی، کیونکہ امریکہ اسرائیل کی کھل کر حمایت اور اس کے اقدامات کا تحفظ کر رہا ہے۔

سابق ملائیشیائی وزیر اعظم نے کہا کہ انسانیت اب خود کو مہذب کہنے کی اہل نہیں رہی۔ ہم بدترین ظلم، ناانصافی، قتل عام اور نہ ختم ہونے والی خونریزی دیکھ رہے ہیں، لیکن خاموش تماشائی بنے ہوئے ہیں۔

واضح رہے کہ 100 سالہ ماہاتیر محمد 1981 سے 2003 تک 22 برس ملائیشیا کے وزیر اعظم رہے، جبکہ 2018 میں ایک بار پھر اقتدار میں آئے، تاہم اندرونی اختلافات کے باعث دو سال سے بھی کم عرصے میں ان کی حکومت ختم ہو گئی۔

یہ بیانات ایسے وقت میں سامنے آئے ہیں جب اکتوبر 2023 سے غزہ جنگ کے آغاز کے بعد مغربی کنارے میں بھی فلسطینی مزاحمتی گروہوں اور اسرائیلی فوج کے درمیان جھڑپوں میں اضافہ ہوا ہے، جہاں رپورٹس کے مطابق ایک ہزار سے زائد فلسطینی شہید، ہزاروں زخمی اور دسیوں ہزار افراد کو گرفتار کیا جا چکا ہے۔