برکینا فاسو میں بڑا دہشت گردانہ حملہ، سینکڑوں افراد ہلاک، ملک بھر میں تین دن تک سوگ کا اعلان کردیا گیا

🗓️ 6 جون 2021

برکینافاسو (سچ خبریں)  مغربی افریقا کے ملک برکینافاسو میں دہشت گردوں نے ایک گاؤں پر حملہ کر کے 100 سے زائد افراد کو ہلاک کردیا جس کے بعد ملک بھر میں تین دن تک سوگ منانے کا اعلان کردیا گیا ہے۔

غیر ملکی میڈیا رپورٹس کے مطابق مغربی افریقہ کے ملک برکینا فاسو میں مسلح حملہ آوروں نے ایک گاؤں پر حملہ کر کے سو سے زائد افراد کو موت کے گھاٹ اتار دیا۔

حملہ آوروں نے جمعہ کی شب مقامی وقت کے مطابق 2 بجے سولہان کے ایک چھوٹے گاؤں میں گھس کر اندھا دھند فائرنگ کردی، فائرنگ سے کئی افراد زخمی بھی ہوئے، حملہ آوروں نے گاؤں کے درجنوں گھروں کو آگ لگا کر خاکستر کردیا۔

رپورٹس کے مطابق حکومت نے ملک میں تین روزہ سوگ کا اعلان کردیا ہے، تاہم حملے کی ذمہ داری اب تک کسی گروہ نے قبول نہیں کی۔

واضح رہے کہ گذشتہ ماہ فوج کی جانب سے انسداد دہشت گردی کے جاری آپر یشن کے نتیجے میں تقریبا 20 دہشت گرد ہلاک اور 4 دہشت گردی کے اڈے تباہ ہوگئے تھے۔

برکینا فاسو کی فوج نے کہا تھا کہ ہونی کے نام سے کریک ڈان آپریشن جس کا مقامی زبان میں مطلب وقار ہے، ملک کے شمالی اور ساحل علاقوں میں ہونے والے دہشت گردوں کے حملے میں کیا جا ر ہا ہے۔

یاد رہے کہ 2015 کے بعد سے، برکینا فاسو کو دہشت گردی کے حملوں سے سکیورٹی کی بگڑتی ہوئی صورتحال کا سامنا ہے جس میں ایک ہزار سے زیادہ افراد ہلاک اور 10 لاکھ سے زیادہ بے گھر ہوچکے ہیں۔