اسرائیل نے غزہ میں 60 روزہ جنگ بندی پر رضامندی ظاہر کر دی؛ٹرمپ کا دعویٰ 

سچ خبریں:امریکی صدر ڈونلڈ ٹرمپ نے دعویٰ کیا ہے کہ اسرائیل غزہ میں 60 دن کی عارضی جنگ بندی پر متفق ہو چکا ہے۔ ان کے مطابق قطر اور مصر اس معاہدے کو حتمی شکل دینے کی کوشش کر رہے ہیں، جبکہ حماس سے اس کی منظوری کی امید ظاہر کی گئی ہے۔

الجزیرہ نیوز چینل کی رپورٹ کے مطابق امریکی صدر ڈونلڈ ٹرمپ نے ایک بار پھر دعویٰ کیا ہے کہ اسرائیل نے غزہ میں جاری جنگ کے خاتمے کے لیے 60 روزہ عارضی جنگ بندی پر رضامندی ظاہر کی ہے۔

یہ بھی پڑھیں:آج بھی غزہ میں کربلا برپا ہے اور عالم اسلام خاموش ہے، خواجہ آصف

رپورٹ کے مطابق، ٹرمپ نے ایک حالیہ بیان میں کہا کہ اسرائیل نے جنگ بندی کے لیے درکار شرائط کو تسلیم کر لیا ہے۔ ہم اس دوران تمام فریقین کے ساتھ مل کر جنگ کے خاتمے کے لیے تعاون کریں گے۔

یہ بیان ایسے وقت میں سامنے آیا ہے جب اسرائیلی وزیر اعظم بنیامین نیتن یاہو آئندہ دنوں میں امریکہ کا دورہ کرنے والے ہیں اور وہاں امریکی حکام سمیت ڈونلڈ ٹرمپ سے ملاقات کریں گے۔ ادھر غزہ میں فلسطینیوں کا قتل عام تاحال جاری ہے۔

ٹرمپ نے مزید بتایا کہ میرے نمائندوں نے آج اسرائیلی حکام کے ساتھ غزہ کے معاملے پر ایک طویل اور تعمیری اجلاس منعقد کیا،انہوں نے، حسب سابق، غزہ میں اسرائیلی جارحیت اور تباہی کا کوئی ذکر کیے بغیر، حماس کو مخاطب کرتے ہوئے کہا کہ امید ہے حماس اس معاہدے کو قبول کرے گی، کیونکہ اگر یہ موقع ضائع ہوا تو صورتحال مزید خراب ہو گی۔

ٹرمپ نے یہ بھی بتایا کہ قطر اور مصر کی ثالثی میں جاری کوششیں آخری مرحلے میں ہیں، اور انہی ممالک کی جانب سے آخری مجوزہ معاہدہ پیش کیا جائے گا،ان کے مطابق قطری اور مصری فریقین نے غزہ میں امن قائم کرنے کے لیے انتہائی مخلصانہ اور مسلسل کوششیں کی ہیں۔

مزید پڑھیں:غزہ کی پٹی میں ممکنہ جنگ بندی کی تفصیلات جاری

اگرچہ یہ دعویٰ سفارتی حلقوں میں ایک پیش رفت کے طور پر دیکھا جا رہا ہے، مگر زمینی حقائق اور اسرائیل کی ماضی کی پالیسیوں کو مدنظر رکھتے ہوئے اس جنگ بندی کی عملی صورت کے حوالے سے ابھی بھی شکوک باقی ہیں۔