نواکشوط (سچ خبریں) فلسطین کی اسلامی تحریک مزاحمت حماس کے سیاسی شعبے کے سربراہ اسماعیل ہنیہ نے موریتانیہ کا دورہ کیا جہاں ملک کے علماء سمیت اعلیٰ حکام کی جانب سے حماس کی قیادت کا شاندار استقبال کیا گیا۔
تفصیلات کے مطابق فلسطین کی اسلامی تحریک مزاحمت حماس کے سیاسی شعبے کے سربراہ اسماعیل ہنیہ کی قیادت میں جماعت کے ایک اعلیٰ اختیاراتی وفد نے موریتانیہ کے دورے کے دوران علما اور سول سوسائٹی کی نمائندہ شخصیات سے ملاقاتیں کی ہیں۔
اس موقعے پر موریتانیہ کے علما نے فلسطینی قوم کی غیر مشروط حمایت جاری رکھنے کے عزم کا اعادہ کیا، انہوں نے کہا کہ فلسطین موریتانوی قوم کے اجماع کی بنیاد ہے اور اس پر کسی کو کوئی اختلاف نہیں۔
انہوں نے حماس کی قیادت کو مزاحمت کی فتح کی مبارک باد پیش کی اور اس فتح کو موریتانوی قوم اور پوری مسلم امہ کی فتح قرار دیا۔
اس موقعے پر اسماعیل ہنیہ نے موریتانوی علما کی فلسطینی قوم کے حقوق کی غیر مشروط اور بے لوث حمایت پران کا شکریہ ادا کیا۔
اسماعیل ہنیہ نے موریتانوی حکومت کی جانب سے عرب لیگ اور دوسرے عالمی فورمز پر فلسطینیوں کے حقوق کے لیے آواز بلند کرنے کو بھی سراہا۔
خیال رہے کہ حماس کا اعلیٰ اختیاراتی وفد اتوار کو موریتانیہ کے دارالحکومت نواکشوط پہنچا تھا جہاں موریتانیہ کے اعلیٰ حکام نے حماس کی قیادت کا استقبال کیا۔
وفد میں سیاسی شعبے کے ارکان موسیٰ ابو مرزوق، عزت الرشق، خلیل الحیہ، جماعت کے ترجمان سامیا بو زھری اور دیگر رہنما شامل ہیں۔