سیگنل ایپ پر امریکی خفیہ معلومات افشاء ہونے کی تحقیقات جاری

سچ خبریں:امریکہ کی قومی سلامتی کے مشیر مائیک والتز کو یمن پر حملے سے متعلق ایک خفیہ گفتگو کے لیک ہونے کے بعد شدید سوالات کا سامنا ہے،اس گفتگو کی تفصیلات مشہور میسجنگ ایپ سیگنل پر افشا ہوئیں، جس تک رسائی ایک امریکی صحافی کو حاصل ہوئی، جس کا تعلق معروف جریدے اٹلانٹک سے بتایا جا رہا ہے۔

یہ بھی پڑھیں:ٹرمپ انتظامیہ کی بڑی چوک: حساس فوجی معلومات کا تبادلہ غیر محفوظ میسجنگ ایپ پر  

قطری نشریاتی ادارے الجزیرہ کی رپورٹ کے مطابق امریکہ کی قومی سلامتی کے مشیر مائیک والتز نے تصدیق کی ہے کہ ایک اعلیٰ سطحی تحقیقات جاری ہیں تاکہ یہ معلوم ہو سکے کہ یہ صحافی سیگنل پر موجود حساس گفتگو تک کس طرح پہنچا، انہوں نے مزید کہا کہ ہم پوری سنجیدگی کے ساتھ اس بات کا جائزہ لے رہے ہیں کہ صحافی کو خفیہ مکالمات تک رسائی کیسے حاصل ہوئی۔

والتز نے بتایا کہ امریکی تحقیقاتی ٹیمیں سیگنل ایپ کی سیکیورٹی خصوصیات کا تفصیل سے جائزہ لے رہی ہیں تاکہ ممکنہ نقائص کا پتا چلایا جا سکے۔

ان کا دعویٰ ہے کہ اب تک کی تحقیق کے مطابق کوئی خفیہ معلومات سیگنل کے ذریعے منتقل نہیں کی گئیں اور قومی سلامتی کونسل اب بھی مضبوطی سے اپنے کام کو انجام دے رہی ہے۔

اس معاملے پر سابق امریکی صدر ڈونلڈ ٹرمپ بھی میدان میں آ گئے ہیں۔ انہوں نے مشیر قومی سلامتی کی حمایت کرتے ہوئے کہا: ہمارے پاس ایک زبردست ٹیم ہے اور قومی سلامتی کونسل بہت مؤثر انداز میں کام کر رہی ہے۔

ٹرمپ نے مزید کہا کہ موجودہ صورتحال کا بغور جائزہ لیا جا رہا ہے، خاص طور پر سیکیورٹی نظام اور معلومات کے افشاء کے خدشات کے حوالے سے۔ ان کا کہنا تھا کہ سیگنل ایپ کے استعمال پر بھی نظرثانی کی جا رہی ہے اور ممکن ہے کہ آئندہ اس ایپ کو سرکاری مقاصد کے لیے استعمال نہ کیا جائے۔

دوسری جانب امریکی ایوان نمائندگان کے ڈیموکریٹ ارکان نے اس حساس معلومات کے افشاء کو خطرناک قرار دیتے ہوئے وزیر دفاع کو طلب کرنے کا اعلان کیا ہے۔

 ان کا کہنا ہے کہ وہ سینیٹ میں ایک باضابطہ اجلاس کے دوران وزیر دفاع سے اس بات کی وضاحت طلب کریں گے کہ یمن میں انصاراللہ پر حملے کی خفیہ منصوبہ بندی کیسے لیک ہوئی اور اس میں سیگنل ایپ کا کیا کردار تھا۔

مزید پڑھیں:نیتن یاہو کے لیے ٹرمپ انتظامیہ کی طرف سے ایک چیلنج

یہ واقعہ امریکی حکومت کے اندر سائبر سیکیورٹی اور معلوماتی رازداری کے نظام پر کئی سوالات اٹھا رہا ہے، خاص طور پر ایسے وقت میں جب مشرق وسطیٰ میں امریکی فوجی سرگرمیوں پر عالمی سطح پر کڑی نظر رکھی جا رہی ہے۔